Duha nakombikto sa illegal drugs

CEBU, Philippines - Gikombikto sa korte ang duha ka mga lalaking nalambigit sa mga kaso sa ginadiling drugas dinhi sa siyudad sa Sugbu lakip na niini ang usa ka tinun-an sa high school.

Ang unang gikombikto ni RTC-7 Executive Judge Meinrado Paredes mao si Edgar Baguio, 30, nga gisilotang mabilanggo sulod sa 12 ka tuig ug pagmulta og 300 mil pesos tungod sa paghupot og 3 ka linikit nga Marijuana.

Sa iyang tulo ka pahinang desisyon, si Paredes miingon nga iyang gihatagan og gibug-aton ang mga ebidensiya sa prosekusyon tungod sa pag-usab-usab sa testimonya ni Baguio.

 Si Baguio naaresto sa mga sakop sa Parian Police Station alas 3:00 sa hapon sa Agusto 23, 2006 samtang ang mga polis nga sila si SPO1 Adolfo Morales, PO3 Raymundo Supatan ug PO2 Rainer Mahinay nagpahigayon og roving patrol sa dalan D. Jakosalem nasigpatan nila kining aktong mokawat sa binugkos nga puthaw ug gikarga sa multicab.

Dihang naabtan ug gikapkapan nakuha gikan sa posesyon niini ang tulo ka mga linikit nga Marijuana.

Si Judge Paredes wala motuo sa testimonya ni Baguio nga human siya sikopa sa polis gipapirma siya og affidavit nga gipreparar daan sa piskalya apan giusab niini dayon ang pamahayag ug miingon nga ang affidavit gihimo sa polis ug dili sa piskal.

Samtang ang ikaduhang gikombikto mao si Romeo Jumao-as Jr. 29, usa ka first year high school, helper sa usa ka piggery farm ug lumad nga taga Pulang-bato, sitio Dita ning dakbayan.

Si Jumao-as gipahamtangan og silot nga pagkabilanggo sulod sa 20 ka tuig ug 400 mil pesos nga multa tungod sa paghupot sa 28 ka pakiteng shabu.

Nasayran nga niadtong alas 4:30 sa kaadlawon sa Enero 28, 2006 ang grupo sa kapolisan sa Cebu City Police Office mi-serve sa search warrant nga giisyu sa RTC-7 branch 15 sa balay ni Jumao-as tungod sa report nga kini tigpayuhot og ginadiling drugas ug pagtinil og drug den.

Nakuha sa kapolisan sa kwarto ni Jumao-as diha sa basement ang 28 ka mga pakiteng shabu nga mitimbang og 11.27 gramos.

Atol sa hearing si Jumao-as mihimakak nga nakuha sa iyang panimalay ang maong ebidensya ug mipasangil nga ‘planted’ kini sa mga polis apan miangkon si Jumao-as nga iyang napirmahan ang resibo sa nakumpiskar nga mga ebidensiya sa pulis human sa gipahigayon nga ronda. (Chester Abadilla)    (BANATNEWS)