600 ka tawo, heavy equipment giandam paghipos sa basura

CEBU, Philippines - Moabot sa 600 ka mga personnel sa Cebu City Hall ang ipakatap alang sa pagpanglimpyo inig ka human sa ika-30 ka Sinulog karong Enero 17.

Si Engineer Dionisio Gualisa, ang labaw sa Department of Public Services (DPS) miingon nga naplantsa na ang ilang gihimong pagpangandam ug nagpaabot na lang ang iyang mga sakop sa implementasyon niini.

Ang labaw sa DPS nga maoy co-chairman sa Cleanliness and Sanitation Committee sa Sinulog 2010 miingon nga ubay-ubay unya ang manglimpyo sa kadalanan.

Kini tungod kay gawas sa mga garbage collector, metro aide ug ubang personnel sa DPS, nagpatabang usab si Gualisa sa personnel sa ubang buhatan sa City Hall.

Kini sama sa Parks and Playground Commission, City Environmental Sanitation and Enforcement Team (Ceset) ug sa Department of Engineering and Public Works (DEPW).Gipahibawo ni Gualisa, nga nanghuwam usab sila og mga ekipo sa DEPW, sama sa unom ka dumptruck ug duha ka payloaders.Sa kinatibuk-an, moabot sa upat ka payloader ang gamiton sa DPS pagkarga sa mga basura ug 28 ka mga dumptruck nga mohakot sa mahipos nga mga biya.Gipasalig ni Gualisa nga malimpyo dayon ang kinatibuk-ang dakbayan partikular na sa parade route sa dili pa mosibaw ang adlaw sa Enero 18.

Sa iyang bahin, gipasalig na usab ni Mayor Tomas Osmeña ang paghatag og tagsa ka sakong bugas isip incentive ngadto sa manglimpyo sa kadalanan.

Kini kung matagbaw gihapon ang mayor sa performance sa mga street cleaners ug garbage collectors nga maoy gitahasan paglimpyo sa siyudad human sa Sinulog.

Butang nga gihangop ug gikalipay ni Gualisa uban sa pasalig nga ilang tinguhaon nga matagbaw ang mayor sa ilang matag tuig nga tahas. (Elly Bolonos)   (BANATNEWS)