Politiko gipaabot nga modagsang sa Fluvial

CEBU, Philippines - Nanawagan ang Philippine Coast Guard Cebu nga maoy modumala sa seguridad ug kaluwasan sa umaabot nga tinuig nga fluvial procession alang sa kapistahan ni Senyor Santo Niño karong Enero 16 nga dili sakyan ug duhigan og pamolitika ang umaabot nga kalihukan.

Si Coast Guard Central and Eastern Visayas Commander Anelito Gabisan mibutyag nga dili sila makapugong niadtong mga kandidato sa umaabot nga piniliay sa Mayo o politiko nga magpalista aron mosalmot sa maong kalihukan.

Ingon man niadtong mopahimulos pagbutang og mga streamers sa pangampanya atol sa maong procession tungod kay wala pay direktiba nga nagdili niini kanila.

Apan miapelar si Gabisan nga dili lang duhigan og pamolitika ang pagsaulog sa kapistahan sa Senyor aron ma-preserbar ang pagka-solimne sa maong okasyon.

Si Gabisan nabalakang gumikan sa nagsingabot nga eleksyon ug kabantog sa Pista Senyor sa Sugbu nga dugokon og mga debotos dili lang sa lalawigan sakyan usab sa mga politiko o nangambisyon og posisyon sa gobiyerno ang maong kalihukan aron makapahimulos sa higayon.

Giklaro hinuon ni Gabisan nga ang labing daku nga barko nga makasalmot sa fluvial procession mao kadtong 450 gross tonnage paubos ngadto na sa mga motorbanca ug yati.  - Darrel Carumba (BANAT NEWS)