Mangapil sa Fluvial procession pasundon sa mga lagda-Coast Guard

CEBU, Philippines - Alang sa kaluwasan ug seguridad sa tanang mosalmot sa fluvial procession sa kapistahan ni Señor Santo Niño karung Sabado sunod semana, giawhag sa Philippine Coast Guard sa pagsunod gyud sa lagda ug mga pahimangnu sa tahasang sea marshals aron paglikay sa disgrasya.

Matud pa ni Anelito Gabisan ang Coast Guard Commander sa Central ug Eastern Visayas sa press conference kagahapon nga sa mga nangaging fluvial procession ilang nasinati ang problemang partisipante mosupak sa mga pahimangnu sa marshals ug moresulta hinuon sa disgrasya.

Dunay mga bangkang de motor nga mouna pa gyud sa galleon gawas nga nagkaguliyang tan-awon peligroso usab sa galleon ug sa mga nagsunod sa prosisyon.

Nunot niini, ilang gikasabotan kagahapon atol sa tigom sa tanang marshals nga magbutang og safety nets aron walay mag-una sa galleon ni Senior Sto. Niño.

Sumala pa niya kun masangit ang mga mag-una-unang bangka sa galleon mapagngan kini’g makina, tuyo usab sa safety net nga mosunod gyud sa formation ang mga nakarehistrong mga sakyanan sa dagat nga moapil.

Kaniadto pipila ka mga sakyanan sa kadagatan nga wala moparehistro ang miapil sa fluvial parade, dunay mga aksidenteng nahitabo gumikan sa mga pagpataka og pabuto og firecrackers.

Ang mga partisipante kinahanglan diha na sa alas-6 sa buntag magpundo sa assembly area aron mahan-ay og maayo ug dili magkagubot sa higayon nga magsugod na ang fluvial procession.

Gawas niini, mihangyo si Gabisan nga ang mga gustong moapil sa fluvial procession nga moadto gyud sa buhatan sa Cebu Coast Guard aron magparehistro nang daan ang ilang sakayan o ba kaha barko.

Gipaabot ni Gabisan nga moabot sa 150 ka mga partisipante ang moapil sa maong fluvial procession apan hangtud kagahapon duha pa lamang ang nakaparehistro ug laing 20 ang nagpadala og suwat sa ilang buhatan nga nagpahibawo sa ilang tinguha pagsalmot niini.

Giawhag niini ang buot nga moapil nga magparehistro samtang layo pa ang deadline karung Enero 12 sanglit pagkasunod adlaw mopatawag siya’g   tigom niadtong mga tag-iya sa sakayan o barko alang sa mga importanteng pahimangno.

Walay bayad ang rehistrasyon sa mga moapil sa fluvial procession apan kinahanglang mopalista gyud sa ilang buhatan aron mabutangan og ilhanan, niadtong Sinulog 2009, 115 ka bangka ug barko ang miapil.

Ang mga marshals unya sa fluvial procession gilangkoban sa puwersa sa Coast Guard sa rehiyon, Coast Guard auxiliary, mga sakop sa Philippine Navy, Cebu Pilots Association, communicators group ug pipila ka mga volunteers. - Rey Pasaporte (BANAT NEWS)