Gang war sa labangon; 1 patay

CEBU, Philippines - Miulbo na usab ang panag-away sa mga grupo sa gang ug fraternity nga miresulta sa kamatayon sa usa ug pagkaangol sa lain pang batan-on human kalit gipamusil sa mga gituohang miyembro sa Crips gang kagahapong adlawa alas-3 sa kaadlawon diha sa sitio Bon-Ami dalan Katipunan barangay Labangon.

Ang namatay nailhan nga si Jeremy “Moymoy” Vincent Magtagad, 19, taga Salvador Extension sa nahisgutang barangay samtang nasamdan usab si Roselyn Duma-og, 27, giingong miyembro sa Alpha Kappa Rho fraternity sumala pa sa kapolisan.

Nasayran nga ang duha nakig-inom uban sa ilang mga higala daplin sa karsada sa nahisgutang lugar dihang mihunong ang usa ka pasaheroang jeep ug usa ka lalaking giingong miyembro sa Crips diha sa maong dapit ang nanaog ug walay daghang pangutana kalit mipusil sa grupo sa mga biktima.

Ang lalaking namusil nga namay-ungan sa pipila sa mga gipamusil gikatahong midagan padulong sa usa ka motorsiklong may duha ka tawong nagpaabot diha sa usa ka fastfood chain pipila ka metros gikan sa nahitaboan ug daling nangikyas padulong sa barangay Tisa.

Si Duma-og nakaangkon og samad pinusilan sa wala nga bukton ug tuong tiil samtang si Magtagad nakaangkon og samad pinusilan sa walang bahin sa iyang lawas.

 Ang duha daling gidala sa Cebu City Medical Center apan si Magtagad gideklarar nga dead on arrival.

Sa pakisusi sa kapolisan sa crime scene nakuha ang usa ka kabhang sa .38 kalibre ug usa ka slug sa wala pa masayring klase sa armas.

Matud pa ni PO3 Geoffrey Gutual sa Homicide Section nga nahinabi sa Banat News nga ang panag-away sa mga fraternity ug gangs maoy inisyal nilang gisusing motibo sa maong pagpamusil. – BANAT NEWS