Babaye nadakpan sa buybust

CEBU, Philippines - Usa ka babaye ang gidakop gumikan sa pagpamaligya og shabu atol sa buybust operation sa City Anti Illegal Drug Special Operation Task Force (CAIDSOTF) sa kapolisan sa Mandaue City Police (MCPO) sa miaging gabii sa sitio San Jose, barangay Labogon, dakbayan sa Mandaue.

Si SPO1 Renato Albuera miila sa nadakpan mao si Rachelle Bayon, nagpuyo sa nahisgotang dapit, laing nadakpan mao si Alejandro Briones, 32, nagpuyo sa barangay Basak.

Ang operasyon gipangulohan ni Inspector Ramil Morpos human makumpirmar sa ilang surveillance nga namaligya og shabu si Bayon sa nahisgotang lugar.

Usa ka police decoy mipalit og shabu nga balor P500 kang Bayon ug human matunol ang duha ka paketeng may sulod nga gidudahang shabu daling gidakop ang suspek, dugang napulo ka medium size nga paketeng may sulod gihapong susamang ilegal nga drugas ang nasakmit sa iyang posesyon.

Samtang si Briones naaktuhan nga mipalit og shabu diha kang Bayon dungan sa police decoy ug giapil kini sa pagsikop ug nakuhaan usab og duha ka paketeng gidudahang shabu.  - Romeo Limpangog ug Bong Soriano (BANAT NEWS)