Traffic enforcer, agent sa PDEA-7 naglalis sa checkpoint

CEBU, Philippines - Sakop sa City Traffic Operations and Management (CITOM) ug confidential agent sa Philippine Drug Enforcement Agency (PDEA-7) nagkalalis atol sa usa ka checkpoint nga miresulta sa pagkasikop sa naulahi human nakuhaan og armas nga walay lisensiya.

Ang traffic enforcer nga si Givenchy Flores misikop kang Jezer Betosa Banzon, 29, taga barangay Tungkil, lungsod sa Minglanilla, atol sa checkpoint nga gihimo sa Osmeña Boulevard sa downtown area kagahapon sa buntag. Si Banzon paingong magkuha sa iyang anak nga nagtungha sa tunghaan duol sa gihimoan og checkpoint sa dihang gipara siya sa traffic enforcer nga naghimo og checkpoint.

Sa dihang gipakita niya iyang ID isip confidential agent sa PDEA-7 gipalahos siya ni Flores. Pipila ka metros, gipara na usab siya ni Flores ug gisita tungod kay walay side mirror iyang motorsiklo.

Nagkatinubagay ang duha sa dihang si Banzon gipangayoan sa iyang lisensiya sa pagmaneho ug mipakita hinuon sa iyang ID sa PDEA-7. Girikisa ni Flores si Banzon ug nakuhaan hinuon og kalibre .45 nga pistola nga walay lisensiya ug walay permit to carry outside residence.

Bisan gipakita ni Banzon ang letter order nga pinirmahan nilang PDEA-7 assistant regional director Randy Pedroso ug Moises Arresgado, hepe sa IID nga mo-expire karon pang Enero 15, gidala gihapon kini sa Investigation and Detective Management Branch (IDMB) sa Cebu City Police Office.

Sa pakighinabi sa mga tigbalita, si Flores nagkanayon nga si Banzon nagpaila kaniya nga polis bisan dili siya polis ug gani gikatahong naghagit pa kini og sinukmagay.

Apan si Banzon miinsister nga wala siya magpailang polis ug miingon siyang nagpaila siyang confidential agent sa PDEA-7 ug si Flores maoy nanghagit kaniya og sinukmagay.

Si CPPO director Patrocinio Comendador sa iyang bahin nagkanayon nga bisan adunay letter order si Banzon nga naggikan sa PDEA, dili gihapon kini basehan nga siya makahupot og armas.

Matud ni Comendador nga pasakaan og kasong illegal possession of firearm si Banzon tungod sa paghupot niini og armas nga walay lisensya. – BANAT NEWS