CEBU, Philippines - Gisugdan na sa Cebu City Police Office kagahapong adlawa ang pagpakatap sa mga hulagway sa mga mangunguot ug manglabnihay nga aduna nay rekord sa korte aron makabantay ang publiko atol sa pagsaulog sa Sinulog.
Si Sr. Supt. Patrocinio Comendador, direktor sa CCPO nagkanayon nga kabahin sa seguridad nga ipatuman atol sa Sinulog ang pagsabwag sa mga hulagway sa mga badlongon sa mga karsada aron malikay ang publiko ug dili mabiktima diha sa kadalanan.
Gimando na ni Comendador kagahapong adlawa ngadto ni Sr. Insp. Michael Bastes, hepe sa Theft and Robbery Section (TRS) ang pagpakatap sa mga hulagway sa mga kiriwa’g kamot diha sa mga pantalan.
Ang CCPO makig-alayon usab sa Maritime Police aron mabantayan usab ang mga pantalan.
Dugang pa ni Comendador nga kun adunay makit-an ang kapolisan nga mga dili taga Sugbo nga maabot ug masota nga adunay rekord sa pagpanguot ug pagpanglabni, ila gilayon kining sikopon ug pasakyon og balik og barko balik sa probinsiyang gigikanan. – BANAT NEWS