CEBU, Philippines - Usa ka mag-uuma nga nagkalingaw og pabuhot sa iyang sigarilyo kalit lang gipusil patay sa usa ka lalaki nga nag-motorsiklo pasado alas 7 sa miaging gabii sa eskina Capricorn ug Zodiac Drive sa Pleasant Homes Subdivision, barangay Punta Princesa ning dakbayan.
Nagtuo ang anak sa gipatay nga nasaypan lang ang iyang amahan.
Si Silverio Olino Bardago, 68, caretaker sa usa ka luna nga gipanag-iya sa usa ka retiradong Col. Alfonte ug lumad nga taga Calape, Daanbantayan wala na makaabot sa tambalanan.
Nasayran nga ang biktima naglingkod samtang nanigarilyo sa gawas nga bahin sa payag nga gipuy-an sa dihang kalit lang mipatim-aw ang usa ka motor nga gimaneho sa usa ka lalaki.
Ang biktima kalit lang gipusil sa makaduha ka higayon. Ang anak niini nga si Renato nga naghigda usab niadtong tungora dapit sa ilang payag daling misulod sa ilang panimalay aron pagsusi sa iyang amahan.
Maoy iyang nakita nga ang iyang amahan naglunang na sa kaugalingon niyang dugo diin gisuwayan pa unta kini niya pagtabang apan nakutloan kini sa kinabuhi.
Ang samad pinusilan sa iyang tampihak maoy gidudahang hinungdan sa hinanaling kamatayon ni Bardago.
Sa pakisusi sa kapolisan sa crime scene nakuha ang duha ka kabhang sa kalibre .45 nga maoy gigamit sa pagpusil patay sa biktima.
Samtang ang kapolisan padayon pa nga nagsusi kun unsay motibo sa pagpatay kang Bardago.
Ang anak nga si Renato nagkanayon nga posibleng nasaypan lang ang iyang amahan tungod kay wala siya'y nasayran nga nakontra niini.
Ang mga silingan ni Bardago nga nahinabi sa ABS-CBN nagkanayon nga ang namatay magkantakanta lang og mga binuang kun mahubog, apan wala kini kaaway. – BANAT NEWS