Referee giluba sa player

CEBU, Philippines - Usa ka referee sa basketball ang gidunggab sa usa sa mga players human gikatahong wala makauyon ang suspek sa desisyon niini atol sa ilang duwa diha sa sitio Napo barangay Bonbon lungsod sa Aloguinsan niadtong Lunes sa alas 4:00 sa hapon.

Ang biktimang referee mao si Gerald Casquejo, 24, molupyo sa nahisgutang lugar samtang ang suspek nga usa sa mga players mao si Gerome Cantal, nagpuyo gihapon sa maong lugar.

Matud ni PO1 Stephen Tibon sa Aloguinsan Police nagduwa og basketball nga pustahanay ang suspek samtang ang biktima maoy referee niadtong higayuna.

Dunay report nga wala makauyon ang suspek sa desisyon sa biktima hinungdan nga sila napildi ug sa kapungot gidunggab niini ang biktima gamit ang icepick ug maayong pagkaigo sa walang bahin sa kilid niini og pagkahuman dayung sibat pahilayo.

Ang biktima daling gitabang ug gihatod dayon sa Toledo City District Hospital apan gi-transfer sab dayon sa Vicente Sotto Memorial Medical Center (VSMMC) dinhi sa siyudad sa Sugbo tungod sa delikadong kahimtang.

Ang kapulisan padayon pa sa ilang hot pursuit pagsikop sa suspek nga pabilin pa karung gawasnon. - Darrel Carumba (BANAT NEWS)