Petisyon sa transport group hanap mapatuman

CEBU, Philippines - Dili pa matagad sa Land Transportation Franchising and Regulatory Board (LTFRB)-7 ang petisyon sa transport groups dinhi sa Sugbu nga usbawan ang minimum nga pletihan sa mga pampublikong sakyanan.

Kini maoy gipahibawo ni Romulo Bernardez, regional director sa LTFRB-7 sa rason niini nga dili mahimong basehanan sa transport groups sama sa City Transport Corporation (Citrasco) ang pagtaas karon sa presyo sa produktong petrolyo sa ilang gipangayo nga usbaw sa minimum nga pletihan.

Matud pa ni Bernardez wala pay klarong direksyon ang presyo sa mga produktong petrolyo tungod kay usahay mosaka ug usahay duna sab kini higayon nga mokalit lang og ubos ang presyo sa matag litro.

Sa sayo pa sa katapusang kwarter sa milabay’ng tuig ang Citrasco miduso og petisyon sa LTFRB nga himuong P7.50 ang minimum nga pletihan sa mga pasaheroan dinhi sa Sugbu gumikan sa padayong pagsaka sa presyo sa matag litro sa produktong petrolyo.

Apan si Bernardez mipasabot nga ang petisyon sa Citrasco atua na sa ilang ulohang buhatan ug gipaabot pa kun unsay desisyon kabahin niini.

Matud pa ni Bernardez nga nakasabot sila sa yangungo ug reklamo sa mga jeepney drivers lakip na ang kadagkuan sa transport groups apan wala silay mahimo niini kundili magpaabot nalang sa desisyon sa ilang ulohang buhatan.

Gihimakak hinuon ni Bernardez nga gilangay-langay sa ilang ulohang buhatan ang pagpagawas sa desisyon kabahin sa usbaw sa pletihan dinhi sa Sugbu.   (Rey Pasaporte)    (BANATNEWS)