Mag-uuma gi-shotgun namatay

CEBU, Philippines - Patay nang nakit-an ang usa ka mag-uumang nabulit sa samad pinusilan ang kalawasan sulod sa lawak sa pinuy-anan sa iyang ig-agaw sa barangay Cantuod lungsod sa Balamban niadtong Domingo sa alas 2:00 sa hapon.

Ang biktima mao si Dionisio Pacaña, 60, biyudo, nga nagpuyo ra sa nahisgutang lugar. Matud pa ni PO3 Eugene Macapas sa Balamban police ang ig-agaw sa biktima nga si Felimon Recafort Pacaña maoy nakadiskubre sa patay’ng lawas sa biktima sulod sa iyang lawak nianang pagpauli niya pagkahapon.

Atol sa pag-responde sa kapulisan nasutang dunay buslot sa luyong bahin sa dunggan dapit sa tangkugo ang biktima nga agi og pinusilan nga maoy gituohang hinungdan sa hinanali niining kamatayon.

Gawas niini duna say daghang samad pinusilan sa walang bahin sa bukton ug abaga ang biktima.

Ang kapulisan naka-recover og daghang mga pellets sa shotgun nga maoy gituohang gigamit sa pagpusil patay sa biktima ingon man laing dose ka buhing bala sa 12 gauge shotgun diha sa crime scene.

Nasuta sab sa gihimong pakisusi sa kapulisan nga ang wala mailhing tawo nga diha moagi sa atubangang pultahan pinaagi sa pagpugos og guba niini ug dayung sulod ug didto gipusil ang biktima.

Gituohan nga gabii pa gipatay ang biktima sanglit nasuta sa kapulisan nga namugnaw na ang patay’ng lawas niini nga naglunang sa nabagtok na nga dugo.

Ang kapulisan padayun pa sa ilang imbestigasyon pagtumbok sa responsable sa maong krimen nga gidudahang may pagdumot sa biktima. (Darrel Carumba)   (BANATNEWS)