Lapu' ipa-Comelec control sa oposisyon

CEBU, Philippines - Gitinguha sa mga kandidato sa oposisyon sa dakbayan sa Lapulapu nga ipaubos sa Commission on Election control ang maong dakbayan gumikan sa nahitabo sa ilang lig-ong lider ug mga pasangil nga pagpang- harass ngadto sa ilang mga supporters.

Kini ang giluwatang pamahayag ni Lapulapu congressional candidate Lito Ruiz ug mayoralty candidate nga si Konsehal Junard “Ahong” Chan atol sa usa ka press conference nga gihimo uban sa mga sakop sa media.

Matud pa ni Chan uban sa ilang kompletong slate sa mga kandidato sa National People’s Coalition sa pagka bise mayor Rico Amores ug konsehales nga mitambong sa maong press conference hugot nilang gikondenar sa pagbanhig-patay sa ilang lig-ong lider sa partido diha sa barangay Kalawisan nga si Allan Berame sa milabay’ng Disyembre 31, 2009.

Sumala pa ni Chan nga linuog ang pagpatay sa ilang lider nga si Berame gumikan kay gihurot gyud ngadto sa lawas ni Berame ang bala sa kalibre .40 nga mitapos sa kinabuhi niini.

Gisalikway ni Chan ug Ruiz ug mga kaubanan ang anggulo sa kapolisan nga love triangle ang usa sa gilantaw nga motibo sa pagbanhig kang Berame nga miangol ni Marites Amit samtang luwan sa sakyanan.

Matud pa ni Chan mas bug-at ang anggulo sa politika ang ilang nakitang motibo sa maong krimen gumikan sa mga hulga nga nadawat ni Berame gikan sa ilang kaatbang sa wala pa kini mahitabo ang krimen.

Gumikan niini si Ruiz misugyot nga ilang hangyuon ang Comelec sa pagpaubos sa dakbayan sa Lapulapu sa Comelec control aron masigurong hapsay ang piniliay sa maong dakbayan sa umaabot nga eleksyon.

Matud pa ni Chan nga bugtong makapahunong sa mga bayolenteng kalihukan kalabot sa eleksyon mao ra ang pagpailawom sa ilang dakbayan sa Comelec control.

Gibutyag ni Chan nga sa milabay’ng Sabado sa gabii, gisaka sa ilang panimalay sa mga armadong tawo si Pangan-an (usa ka Brgy. sa Isla sa Olango) barangay Kapitan Climaco “Montor” Tatoy ug gihulgang madisgrasya kung mopadayon og suporta sa grupo ni Chan ug Ruiz.

Samtang mipasangil usab silang ang ilang mga lider sa barangay Basak, Buaya ug Canjulao gisugdan na og pagpang-harras ug nakadawat na og sunodsunod nga hulga sa ilang mga kinabuhi gumikan sa ilang pagsuporta sa grupo ni Chan. (Bong Soriano)    (BANATNEWS)