12 ka balay naugdaw

CEBU, Philippines - Dose ka mga panimalay ang hingpit nga naugdaw ug duha usab ang partially burned sa nahitabong sunog kagahapon sa buntag didto sa sitio Manga sa barangay Tisa dakbayan sa Sugbo.

Alas 8:45 nadawat sa kabomberohan ang alarma ug sulod sa napulo ka minuto nakontrolar nila ang kalayo human maisa ngadto sa third alarm ang maong sunog.

Gibana-banang mokabat sa 250 mil pesos ang danyos niini apan walay kinabuhing nakalas o naangol sa hitabo.

Matud pa ni SFO1 Nilo Daculan ang imbestigador sa kabomberohan ang maong sunog nga nagsugod sa panimalay sa usa ka Herman Ragasajo kansang pinuy-anan ginama sa mga light materials ingon man ang mga kasikbit nga nangaugdaw’ng balay.

Padayon pang gisusi sa mga fire investigators kon unsa ang hinungdan sa maong sunog sanglit giingong naputlan naman og kuryente ang panimalay ni Ragasajo ug ang live-in partner ra sa anak niini maoy nahabilin dihang nahitabo ang sunog. Kini mao ang labing unang sunog nga mi-igo dinhi sa Sugbo ning tuig 2010.   (Guam Logroño)    (BANATNEWS)