Kagawad mibabag sa buybust operation batok sa anak maoy gidakop

CEBU, Philippines - Kanhi barangay kapitan ug karon barangay kagawad na sa barangay Looc dakbayan sa Danao ang gisikop sa mga sakop sa Provincial Intelligence Branch (PIB) human dasmagi sa iyang motorsiklo ug nanukmag sa mga polis nga misikop sa iyang anak nga gidudahang drug pusher niadtong Domingo sa gabii.

Ang gihimo ni Kagawad Antonio Alvaro, maoy nakaingon nga nakaeskapo ang anak niining si Alvaro “Barok” Alvaro maoy subject sa buy-bust operation hinungdan nga siya maoy gidakop nila ni SPO2 Ferdinand Navalez ug mga kaubanan sa PIB.

Una niini mga alas 8:30 niadtong Domingo sa gabii ang mga sakop sa PIB pinanguluhan sa ilang team lider SPO2 Navalez mipahigayon og buy-bust operation inabagan sa mga sakop sa kapulisan sa dakbayan sa Danao ug mga ahente sa Philippine Drug Enforcement Agency diha sa Tupaz Street barangay Poblacion Danao.

Si PO2 Tiburcio Heramil sa PIB maoy nagsilbing poseur buyer uban sa ilang impormante diha sa barangay Poblacion ginamit ang P1,500 nga kantidad sa shabu nga ilang gipalit diha sa panimalay sa kabanay ni Alvaro nga diin usab ang naulahi mamaligya sa maong gidiling drugas.

Si PO2 Heramil nga nahinabi sa mga sakop sa media mibutyag nga siya maoy naghatag sa kwarta ngadto na sa asawa sa suspetsado nga si Alma ug si Barok maoy mitunol sa shabu hinungdan nga ilaha kining gisignit.

Apan human nila maposasi   si Barok ug laing wala mailhing kauban niini kalit nga miabot ang kagawad ug diretso og dasmag sa motorsiklo niini sa mga polis ug labihang sukoa nga nagpaila sa iyang kaugalingon nga usa siya ka kapitan, apan nasuta nga kagawad nalang diay kini.

Gikatahong nadasmagan sa motor si PO2 Heramil samtang nasukmagan usab niini si SPO2 Navales nga miresulta sa kaguliyang dihang miapil og babag ang asawa ni Barok nga si Alma ug igsuon niining si Maria Theresa Veloso, ang mga polis napugos sa pagpabuto og warning shot dihang nagsugod na og kuninit ang mga tawo.

 Ang kagawad ug asawa ni Barok nga si Alma gumikan sa pagpanakit ngadto sa mga polis ug pagbabag sa operasyon maoy gibitbit sa PIB ug gipasakaan og kasong obstruction of justice ug ingon man dugang kasong direct assault batok sa kagawad, samtang si Veloso gitanggong usab ngadto sa Danao City police station ug kasuhan usab og obstruction of justice.

Nakuha sa kapolisan gikan ni Barok sa usa ka kalibre .45 nga may unom ka mga buhing bala sulod sa magazine, usa ka medium pack nga may sulod nga gituuhang shabu, ang marked money nga P1,500, samtang nakuhaan usab og .380 pistol nga dunay unom ka buhing mga bala ang kauban ni Barok nga nakaeskapo.

Si PO2 Heramil mibutyag nga level 1 nga drug pusher si Alvaro diha sa dakbayan sa Danao, kini maoy sagad hinganlan sa mga nangadakpang pushers nga ilang supplier og shabu.

Nabutang usab kini sa watchlist sa PDEA-7 ug gi-ronda na usab kaniadto ang panimalay niini apan kanunay’ng makaeskapo.

Dugang nakuhang ebidensya sa kapulisan ang cellphone ni Barok nga dunay daghang kontak sa ilegal nga drugas nga mi-order og mga dagkong kantidad sa shabu lakip na ang kontak niini sa Ozamis City. Ang pangulo sa kapulisan sa lalawigan sa Sugbu Sr. Supt. Jesus Gaquing nga gawas sa kasong kriminal duna say atubangon unyang kasong administratiba si Kagawad Alvaro diha sa Ombudsman ug sa Department of Interior and Local Government. (Guam Logroño)    (BANATNEWS)