Miunay og luba sa silingan misurender

CEBU, Philippines - Ang usa ka tawo kinsa miunay og dunggab angol sa iyang silingang babaye didto sa barangay Pardo, ning dakbayan sa Sugbo niadtong Biyernes, boluntaryong misurender sa kapolisan sa Pardo Police Station kagahapon.

Sa pakighinabi sa Banat News  kang Jose Elman Jr., igsoon sa gidunggab nga si Aurea “Auring” Elman, kini mibutyag   nga ang tuyo sa suspetsado nga si Noel Cabatas Ramos, 26, buot untang mangawat sa sulod sa balay sa biktima.

Apan sa pakighinabi ni PO3 Geoffrey Gutual sa Banat News kini nagkanayon nga mitug-an ang suspetsado nga wala siya masayod sa iyang gibuhat niadtong tungora.

Dugang pa ni Gutual nga lisod kaayong tuohan nga pangawat maoy motibo sa suspetsado niadtong higayona kay wala sila'y nakitang “force entry” sa panimalay sa biktima .

Matud pa ni Gutual nga ang suspetsado posible usab nga sabog ug hubog , base sa iyang gibuhiang pamahayag sa dihang gipangutana kini sa kapolisan sa Pardo.

Kini tungod kay aduna sila'y nadawat nga mga estorya nga ang suspetsado usa ka drug addict nga gitawag nila og “manuyopay”.

Samtang si Madeline, ang anak sa biktima nagkanayon nga anaa na sa luwas nga kahimtang ang iyang inahan sulod sa tambalanan sa pagkakaron.

Mahinumdoman nga nadala sa tambalanan ang biktima human kini dunggaba sa suspetsado sa wala'y igong hinungdan. – BANAT NEWS