Simbahan may tahas sa kinaiyahan

CEBU, Philippines - Dili lang ang publiko ug mga gobiyerno ang giawhag ni Pope Benedict XVI pagprotiher sa nagkaanam na og kaguba nga kinaiyahan kundili lakip na ang mga sakop sa simbahan sa kalibutan.

Kini maoy kabahin sa 2010 World Peace Day nga mensahe sa Santo Papa niadtong Enero 1 niining tuiga nga may temang “If You Want to Cultivate Peace, Protect Creation” nga nagsentro sa pagmahal sa kinabuhi ug sa kinaiyahan.

Matud pa sa Santo Papa ang Simbahan kinahanglang moako og responsibilidad sa publiko aron maprotihian ang kayutaan, ang katubigan ug kahanginan tungod kay kini gasa sa Ginoong Magbubuhat alang sa tanan ug labaw sa tanan alang sa kaluwasan sa katawhan gikan sa kaalaotan.

Sumala pa sa mensahe sa Santo Papa nga ang padayong pagkaguba sa kinaiyahan dunay relasyon sa namat-ang kultura sa katawhan, matud pa niini nga kun ang tawo respetuhon makabenepisyo usab niini ang kinaiyahan.

Apan giklaro niini nga ang kabataan dili mapugos nga parespetuhon sa kinaiyahan kung dili sila giyahan sa ilang mga pamilya ug sa komunidad aron makat-ong morespetar sa ilang mga kaugalingon.

Gipasabot sa Santo Papa nga ang libro sa kinaiyahan dili mahimong mabuak o buwagon tungod kay kabahin na niini ang matag indibidwal, pamilya, social ethics. Gipahinumduman niya ang Simbahan nga ang tahas pagprotiher sa kinaiyahan nagsentro sa mga tawo.

“Hence I readily encourage efforts to promote a greater sense of ecological responsibility which, as I indicated in my Encyclical Caritas in Veritate, would safeguard an authentic human ecology and thus forcefully reaffirm the inviolability of human life at every stage and in every condition, the dignity of the person and the unique mission of the family, where one is trained in love of neighbor and respect for nature. There is a need to safeguard the human patrimony of society. This patrimony of values originates in and is part of the natural moral law, which is the foundation of respect for the human person and creation,” matud pa niini sa nakutlong mensahe sa website sa Vatican.

Giklaro hinuon sa Santo Papa nga ang hustong pagpakita og pagmahal ug pag-atiman sa kinaiyahan mao kadtong nakasabot nga ang relasyon sa tawo ug sa kinaiyahan dili mahimong buwagon, dili mahimong ang usa ray pilion batok sa usa.

Kini maoy hinungdan nga pipila sa mga kalihukan nga nangangkong alang sa proteksyon sa kinaiyahan ang gisupak sa Simbahan gumikan kay mas gipalabi ang kinaiyahan ug wala na ang mga tawo o ba kaha gisiguro ang tawo ug wala na ang kinaiyahan.

Gipahinumduman sa Santo Papa ang katawhan nga sila (mga tawo) maoy modumala ug moatiman sa binuhat sa Ginoo subay sa nalatid sa kasulatan, tahas nga dili mahimong abusohon ug labaw nang talikdan sa tawo.

Dinhi sa Sugbu, si Cebu Archdiocese Ricardo Cardinal Vidal mipahibalong dunay tukurong komitiba nga langkuban sa mga relihiyosong pundok maoy mohimo og mga programa nga motutok sa pagprotiher sa kinaiyahan.

Kining maong grupo makig-alayon sa mga local nga kagamhanan alang sa katumanan sa mga programa sa kinaiyahan nga magsentro usab sa mga tawo. – BANAT NEWS