CCMC duna pay paglaum

CEBU, Philippines - Nakakita og paglaum si Cebu City Mayor Tomas Osmeña sa Cebu City Medical Center (CCMC) ug posibleng dili na niini ihinayon ang planong pagsira o pagbaligya sa nahisgutang tambalanan.

Nakahukom ang mayor kaniadto pagpasira o pagbaligya sa CCMC tungod sa iyang kadismaya sa serbisyo nga gihatag sa mga personnel niini maong buot niyang i-outsource na lang ang medical services o hatagan og health insurance ang kabus nga mga molupyo sa dakbayan.

Kini tungod sa pagtuo sa mayor nga makahatag og maayong serbisyo ang pribadong mga tambalanan itandi sa CCMC apan kini miani og mga pagsaway dili lang gikan sa mga kaatbang sa pulitika ni Osmeña kundili lakip na sa ubang mga molupyo sa siyudad.

Nabalaka ang ubang mga residente nga wala na sila'y kadaganan nga publikong tambalanan sa dakbayan panahon sa emerhensya.

Apan sa hinapos nga bahin niadtong miaging tuig, gikuha sa mayor ang serbisyo sa usa ka batid nga emergency physician nga si Doctor Edgar Abelgas.

Pipila ka buwan ang nakalabay, nakamatikod na si Osmeña nga duna nay kalamboan ang serbisyo sa tambalanan partikular na sa emergency room.

Tungod niini, posibleng dili na ihinayon sa mayor ang iyang nahaunang plano pagsira o pagbaligya sa nahisgutang tambalanan.

Gitataw ni Abelgas nga lakip sa kausaban nga iyang gipatuman sa emergency room mao ang pag-atiman dayon sa pasyente.

 “Sa una man gud, dili dayon atimanon ang pasyente, interbyuhon una, daghan pang kuti-kuti, ang atong gibuhat karon, atimanon una ang pasyente kung nanginahanglan og dinaliang medical attention, ipaawahi lang nang pagkuha og information,” sumala ni Abelgas.

Gipadayag ni Osmeña nga dunay inisyatiba si Abelgas gawas sa leadership skills niini ug iyang gikalipay ang kalamboan sa emergency room.

 Gipasalig sa mayor pagsuporta kang Abelgas pagdumala sa emergency room nga posibleng moresulta sa pagdumala unya niini sa tibuok tambalanan.

 “I told him nga you start with that first, then later on, siya na ang magbuot sa mga activities sa hospital…it’s a matter of time lang,” matud ni Osmeña.

Nasayran nga gawas sa emergency room, si Abelgas usab ang nagsuperbisar sa out-patient department sa ospital ingon man sa city health department.

Si Abelgas, 52, gradwado sa Gullas College of Medicine niadtong 1988 ug dunay Master of Public Health degree, nakatrabaho sa ubang kanasuran isip hospital manager, emergency physician ug public health officer sa wala pa muuli sa Sugbu.

Lakip sa mga nasod nga gitrabahoan ni Abelgas mao ang China, Brunei, Singapore, Equitorial Guinea West Africa, South Africa, Kazakhstan, Russia, U.S.A., Madagascar and Australia. – BANAT NEWS