Election Officers bansayon ning buwana

CEBU, Philippines - Sulod ning buwana gitakdang sugdan na ang pagbansay sa tanang election officers sa probinsya sa Sugbu alang sa poll automation sa umaabot nga Mayo 2010.

Si Cebu provincial Comelec Supervisor Lionel Marco Castillano nagkanayon nga ang maong training adto ipahigayon sa kaulohan.

Miingon siya nga importante kaayo kining maong training aron mahibaw-an sa mga election officers ang mga paagi sa automated election kay mao kini ang labing una sa kasaysayan sa piniliay dinhi sa Pilipinas.

Matud ni Castillano nga human unya sa training sa mga election officers, bansayon na usab nila ang tanang opisyal sa eskuylahan ug mga magtutudlo nga moserbisyo sa election .

Gumikan niini giawhag ni Castillano ang lokal nga kagamhanan nga mogahin og pundo aron ipalit og mga projector nga gamiton sa pagpahigayon og lektura ngadto sa mga bansayon kabahin sa automated election.

Gipasabot usab niya nga mas labing maayo nga makakat-on usab ang mga botante bahin sa angay nilang buhaton sa panahong mobotar na sila pinaagi sa modernong sistema sa botasyon.

Sa laing bahin gibati og kabalaka si Castillano basin nga mahimong dugoon ang umaabot nga piniliay ilabi na nga gitawag karong tuiga og year of the tiger nga buot ipasabot tuig sa tigre.

Ang tigre, tigre gyud ug maayo unta nga dili mahisama ang hunahuna sa tawo sa kinaiya sa tigre, ilabi na sa panahon sa piniliay sa Mayo, matud pa ni Castillano.   - Rey Pasaporte (BANAT NEWS)