Gisungag sa kabaw kritikal

CEBU, Philippines - Anaa pa gihapon sa talandugong kahimtang ang usa ka mag-uuma kinsa gisungag sa nag-wild niyang kabaw didto sa lungsod sa Ronda sa miaging adlaw.

Ang kapolisan sa Ronda miila sa biktima nga si   Alfredo Cardillas Sr., hingkod, ug lumad nga taga Langob, bukirang barangay sa lungsod sa Ronda.

Nasayran nga human sa iyang pagdaro nianang sayo sa buntag gitugway sa biktima ang iyang kabaw sa kasagbotan sa ilang luna.

Apan nianang pagkahapon sa iyang pagbalik aron hipuson ang kabaw kalit lamang kining nag-wild ug wala siya kabantay nga kalit lamang siyang gidasmagan ug gisungay niini.

Gumikan sa kakusgan sa kabaw nabali-bali ang kalawasan sa biktima gawas sa mga samad ug pangos nga naangkon niini ug nakuyapan siya niadtong tungora.

Dali nga gihatod ang biktima ngadto sa tambalanan sa lungsod apan gumikan sa kagrabi niini, gibalhin kini sa usa sa mga pribadong hospital sa siyudad sa Sugbu.

Gumikan sa kalagot sa pamilya sa biktima gigapos ang maong kabaw kay ila nalang kining ibaligya aron ang halin ikapalit og tambal sa biktima. -  BANAT NEWS