Kahero gitulis, giluba

CEBU, Philippines - Naangol ang usa ka burger machine service teller human kini dunggaba sa nagbinugtong nga tulisan dihang misulay unta kini og sukol alas-4 pasado ang takna sa kaadlawon niadtong Bag-ong Tuig sa dalan P. del Pilar sa barangay Poblacion, dakbayan sa Danao.

Ang biktima mao si Richard Roble, 18, taga barangay Sta. Rosa sa nahisgutang dakbayan ug service teller sa burger machine sa nahisgutang dapit.

Si SPO4 Edgar Gomez miingon nga ang suspetsado nailhan nga usa ka Jeffrey Murillo Bataluna, alyas Tiptip ug giingong nagpuyo sa maong dapit.

Matud pa ni SPO4 Gomez nga nag-ihap sa iyang halin dihang mitumaw ang suspek ug mideklarar og tulis dungan sa paglabni sa kwarta nga nagkantidad og P1,500.

Misukol unta ang biktima pinaagi sa pagkuha’g balik sa kwarta apan gidunggab kini sa suspetsado diha sa bukton dayong daling ikyas.

Ang biktima nagpatabang sa mga tawo ug gihatud sa tambalanan samtang ang tulisan wala na igkita pa.  - Romeo Limpangog (BANAT NEWS)