Asawang gustong mag-videoke gidunggab sa bana

CEBU, Philippines - Talandugon ang kahimtang sa usa ka inahan human gidunggab sa iyang banang hubog atol sa Bag-ong Tuig sa barangay Damulog, lungsod sa Sogod.

Ang biktima kinsa naa karon sa usa sa mga tambalanan sa dakbayan sa Sugbu giila sa kapulisan nga si Julita Good, 40, nagtrabaho isip usa ka katabang, nasamdam sa iyang tiyan human dunggaba sa iyang banang si Allan Good, 49.

Si Good nadakpan sa kapolisan sa gihimong follow up operation, gikatakdang pasakaa’g kasong frustrated parricide karong Lunes.

Si PO1 Tirso Coming, desk officer sa Sogod Police Station nagkanayon nga miangkon ang bana nga si Allan nga nagselos siya ngadto sa iyang asawa.

Una niini ang managtiayon gikan kini sa barangay Liki sa nahisgutang lugar nga mitambong og party sa panimalay sa iyang asawa apan sa ilang paghiabot nahitabo ang init nga panaglalis kay di pa-videokihon ang ginang sa suspek.

Matud pa ni PO1 Coming nga nalagot ang biktima sa iyang bana nga wala siya tugti nga mag-videoke mipadayag kini nga kadto nalang adlawa maoy ilang katapusang adlaw nga magkauban.

Hinungdan nga miulbo sa kasuko ang bana ug nadunggaban niini ang asawa, ang bana giingong dugay nang nasuko sa asawa tungod kay tagdugay na kining mag-ulian kanila sukad nanrabaho isip katabang.  - Guam Logroño (BANAT NEWS)