Oposisyon sa Lapu nagtuong politika ang motibo sa ambush

CEBU, Philippines - Lig-ong leader sa usa ka oposisyon nga kandidato ang gipusil patay samtang naangol ang babayeng financer sa casino nga kuyog niini ug maoy tag-iya sa sakyanang ilang gisakyan human sila gibanhigan sa duha ka tawong nagmotorsiklo sa dalan ML Quezon Avenue sa barangay Pajo dakbayan sa Lapulapu sa milabay’ng bisperas sa Bag-ong Tuig.

Apan ang kapolisan mibutyag nga ang anggulong love triangle maoy usa sa ilang gisubay karon nga motibo sa pagpamanhig sa mga biktimang sila si Marites Amit, 42, nga taga Humayhumay,barangay Pajo ug Alan Berame nga taga barangay Kalawisan nga giingong bodyguard niini.

Kini tungod kay walay bisan usa ka butang sa mga biktima ang gikuha sa namanhig human sa pagpamusil, apan wala hinuon mohatag og dugang detalye si SPO1 Jack Inihao sa Crime Against Persons sa Lapulapu City Police Office kabahin sa maong anggulo.

Apan si Lapulapu City mayoralty candidate Junard “Ahong” Chan ug congressional candidate Lito Ruiz sa pakighinabi sa Banat News nagkanayon nga dili sila makatuong si Amit maoy tuyo sa mga killers kundili si Berame gyud.

Si Ruiz nagkanayon nga si Berame maoy usa sa lig-ong leader sa ilang partido diha sa Kalawisan nga kanhi sakop ni Lapulapu City Mayor Arturo Radaza.

Matud pa ni Ruiz nga sa wala pa mahitabo ang maong krimen siya gisultihan ni Berame (biktima) nga nakadawat na kini og mga bahad nga dili na moabot sa pagsaulog sa Pasko o Bag-ong Tuig kung dili kini mobali sa iyang pagsuporta nila ni Ruiz ug Chan.

Ang pamahayag ni Ruiz gidasunan ni Chan atol sa linaing pakighinabi sa Banat News ug misaysay nga sa wala pa sila moduso sa ilang Certipiko de Kandidatora gisultihan siya ni Berame nga gipatawag siya sa usa ka dakong opisyal sa dakbayan ug gihangyong pabiyaon sa pagsuporta sa grupo ni Chan, apan wala kini mokihol sa hangyo kay kumpare silang duha ni Chan ug dako usab siya og utang financial sa naulahi.

Ikaduhang semana sa bulan sa Disyembre 2009 mi-resign sa iyang trabaho sa city hall si Berame ug mi-concentrate sa pagsuporta ngadto sa grupo ni Chan ug Ruiz.

Hinuon wala motumbok si Chan kung kinsa ang nagpapatay ni Berame apan siya nagdudang ang kamatayon ni Berame adunay kalambigitan sa politika.

Kahinumduman nga sa milabay’ng Disyembre 31, 2009 alas 3:45 sa kahapunon samtang luwan si Berame sa sakyanan ni Marites Amit padulong na unta mopauli dihang kalit nga gibanhigan sa duha ka mga tawong luwan sa usa ka motorsiklo.  - Bong Soriano ug Romeo Limpangog (BANAT NEWS)