CEBU, Philippines - Naangol ang usa ka tawo human kini pusila sulod sa usa ka imnanan didto sa Biatres Village, sa barangay Poblacion, dakbayan sa Danao, sa miaging gabii.
Ang biktima mao si Benito Isoto, 59, nga taga Biatres Village, samtang ang suspetsado mao si Ricardo Bascones, hingkod, ug silingan sa biktima. Matud pa ni SPO3 Aresteo Espina, sa Danao City Police Station nga nag-inom ang biktima ug ang suspetsado sulod sa usa ka imnanan sa maong lugar dihang nagkalalis kini.
Apan ang suspetsado kinsa armado og .45 ka kalibreng pistola naupsan sa pailob ug dala sa kainit sa ulo nga nasugnoran sa ilimnong makahubog milanit sa iyang armas ug gitirohan ang biktima.
Ang biktima nga nasabak sa duha ka bala ang tuong paa ug bat-ang niini gidali paghatod ngadto sa Vicente Sotto Memorial Medical Center sa dakbayan sa Sugbo.
Samtang ang suspetsado dali usab kaayong nakasibat ug mao karon ang gipangita sa kapolisan sa dakbayan sa Danao. - Bong Soriano (BANAT NEWS)