CEBU, Philippines - Buot karong pa-imbestigaran ni Talisay City administrator ang report nga dunay mga kawani sa dakbayan nga tiggamitan og illegal drugs ug pipila niini kanila anha pa gyud sa city hall maghingos niini.
Si Talisay City administrator Richel Bacaltos nakadawat og mga taho kabahin niini gikan sa ubang mga residente sa siyudad nga giingong nakamatikod sa maong mga binuang.
Gawas usab nga dunay mga kawaning giingong anha mag-pot session sulod sa city hall duna say higayon nga anha nila kini buhaton sa bakanteng kwarto sama sa bodega sa city hall atol sa break time.
Apan ang maong taho gihimakak sa hepe sa Civil Security Unit (CSU) nga si Roger Villaver dihang gikuhaan sa Banat News og pamahayag kabahin sa maong report.
Matud pang Villaver bisan og break time padayon ang mga sakop sa CSU diha sa city hall sa pag-roving ug walay nasakpang mga kawani nga manulod diha sa bodega, samtang dili usab mahimo sa ubang mga lawak tungod kay pulos kini okupado.
Samtang si Bacaltos sa iyang bahin dili usab makatuong diha gyud himuon sa mga kawani ang pagsuyop sa mga tiggamitan og drugas nga mga kawani.
Apan miangkon hinuon siyang dunay mga report na siyang nadawat nga dunay mga kawani kasagaran niini mga job orders ang magpanon ngadto sa usa ka barangay sa siyudad nga nadungog na kaayong suroyanan sa mga adik kinsa gustong mogamit og drugas.
Kahinumduman nga niadtong milabay'ng tuig ang siyudad giingong nagplanong mopahigayon og random drug test sa mga kawani apan wala kini mahinayon tungod kay duna nay imbestigasyong gihimo ang Human Resource Management Office (HRMO) kabahin sa mga report nga dunay mga adik nga empleyado sa city hall.
Hangtud karon padayong nagpaabot ang administrador sa resulta sa maong imbestigasyon. - BANAT NEWS