CSU sa Talisay misipyat

CEBU, Philippines - Nila ni Brenda D. Batuto ug Raymond D. Abarcas UV Journalism Intern

Ang hepe sa Civil Security Unit (CSU) sa dakbayan sa Talisay miangkon nga may sipyat ang ilang buhatan tungod sa pag-vandal sa national shrine nga nahimutang sa barangay Poblacion sa nahisgutang siyudad nga wala mabantayi pag-ayo nila.

Ang gihilabtan sa wala hiilhing tawo mao ang mga dayan-dayan sama sa pusil sa mga estatuwang sundalo sa maong shrine nga gipamutol, ang ubang mga suga wala na mosiga, nangaguba na ang ubang mga poste sa suga, ug naputol na nga birha sa koral samtang ang hagdanan napahak na , ug nangatangtang na ang pintal sa sawog niini.

Ang hepe sa CSU nga si Roger Villaver nagkanayon nga dihang gipatawag siya ni Talisay City Administrator Richel Bacaltos kabahin sa maong problema, iyang giangkon nga may sipyat sila tungod kay kuwang usab sila sa mga kawani.

Ang upat ka mga job order nga nadestino diha sa CSU kinsa maoy gisangunang magbantay panahon sa kagabhion sa nahisgutang lugar wala na makabalik sa ilang trabaho.

Ang maong mga trabahante lakip sa mga nakapahimulos sa employment program sa Department of Labor and Employment (DOLE) nga maoy migahin og budget alang sa mga suholan sa mga kawaning nakapahimulos sa ilang programa.

Si Villaver nagkanayon nga iyang gihangyo si Bacaltos nga ipasusi ang materyales sa maong mga estatuwa tungod kay ilang nakita nga dili kini polido ug mangayo usab sila og second opinion sa usa ka engineer bahin niini.

Sa laing bahin, si Konsehal Shirley Belleza, chairman sa Tourism Heritage and Historical Affair sa siyudad nagkanayon nga naghuwat siya sa resulta sa imbestigasyon nga gipahigayon sa General Services Office ug Human Resource Management Office.

Midugang siya nga hatagan nila og prayoridad karong umaabot nga tuig ang pagpaayo sa maong estatuwa. (Brenda D. Batuto ug Raymond D. Abarcas UV Journalism Intern)

BHW sa Talisay may cash gift

Nila ni Brenda D. Batuto uban kang Raymond D. Abarcas UV Journalism Intern)

Mikapin sa 300 ka mga Barangay Health Workers (BHW) ug Day Care Workers (DCW)sa dakbayan sa Talisay ang nakadawat og cash gift gikan sa kagamhanan sa probinsiya niadtong Martes.

Si Talisay City Treasurer Emma Macuto mibutyag sa Banat News nga ang matag usa sa 329 ka mga BHW ug 33 ka DCW ang nakadawat og tag P1,500 nga pinaskohan gikan sa Kapitolyo.

Karong tuiga maoy ikaduhang tuig nga nakadawat og pinaskohan ang mga BHW ug DCW gikan sa kagamhanan sa lalawigan.

Hinuon tag P1,200 ra ang nadawat sa maong mga trabahante sa milabay'ng tuig, matud pa ni Macuto.

Samtang ang mga regular nga kawani sa city hall niadto rang Disyembre 18 ning tuiga nakadawat sa ilang additional bonus nga tag P15,000 ug one month salary.

Ang mga job order nakadawat og tag P5,000 nga bonus matag usa kanila.

Si Macuto mibutyag nga ang dakbayan adunay mokapin sa 200 ka mga regular nga kawani samtang kapin usab sa 900 ka mga job order. (Brenda D. Batuto uban kang Raymond D. Abarcas UV Journalism Intern) (BANATNEWS)