Minus ang biktima sa pabuto

CEBU, Philippines - Minus ang nabiktima sa pabuto karong tuiga kun itandi sa nakalabay'ng katuigan diin tulo ka tawo ang natala nga naangol sa Lapulapu City Hospital sa milabay'ng Huwebes, adlaw sa Pasko.

Ang nabiktima mao sila ni Mark Reponte, 11, taga barangay Gun-ob, Reinna Tuico, 13, sa Babag I, ug si Laoro Fernandez, 43, minyo, sa Pusok, tanan sa dakbayan sa Lapulapu.

Sumala sa mga biktima kinsa pulos nangapaso sa kamot nga igo ra silang namunit og mga pabuto sa karsada dihang pagduslit nila kalit kaayong mibuto diha sa ilang mga kamot hinungdan nga nangakimay kini.

Gumikan niini mapasalamaton kaayo si Lapulapu City Police Director P/Ssupt. Mariano Natu-el Jr. nga malinawon kaayo sa pagsaulog sa Pasko ang dakbayan sa Lapulapu. (Bong Soriano)

5 ka balay nasunog sa Lapulapu

Mikabat sa lima ka balay ang nasunog dihang miulbo ang kayo didto sa sitio Camias, barangay Looc, dakbayan sa Lapulapu, niadtong Martes.

Hinuon usa ra sa lima ka balay maoy hingpit nga naugdaw samtang ang upat igo lang gipahakan sa kayo.

Ang naugdaw mao ang balay nga gipanag-iya ni Maxima Solana samtang ang mga panimalay nga nakan-an sa kayo mao ang ila ni Nilia Orito, Gloria Solana, Marina Tarona ug Rodulfo Solana.

Base sa imbestigasyon ni SFO2 Jumid Alburo sa kabomberohan sa Lapulapu, nasayran nga didto magsugod ang kayo sa panimalay ni Maxima Solana gumikan sa gidudahan nilang electric fan nga mi-over heat.

Unya tungod kay ginama sa mga gaan nga mga dapat, dali ra kaayong gidutlan sa kayo ang maong mga balay.

Maayo nalang kay dali kaayong nakatubag sa alarma sa maong sunog ang kabomberohan hinungdan nga lima ray nabiktimang mga balay.

Samtang gibanabana ni SFO2 Alburo nga mokabat sa P80 mil ang katibuk-ang kadaot sa maong sunog ug walay namatay o kaha naangol nga kinabuhi. (Bong Soriano) (BANATNEWS)