German national nanghasi gipriso

CEBU, Philippines - Nagtingkagol sa Talisay City detention cell ang usa ka German national kinsa giingong hubog ug nanghasi sa iyang kapuyo ug sa paryente niini, niadtong Biyernes sa gabii adlaw sa Pasko didto sa barangay Cansojong, dakbayan sa Talisay. Ang suspetsado mao si Wieland Peter Wolf, 49, kinsa temporaryong nagpuyo sa maong lugar.

Ang mga biktima mao sila si Charry Restauro, 18, live-in partner sa suspetsado ug Cristita Restauro, 40, dalaga, paryente ni Charry, nga kaipon sa pagpuyo sa magtiayon.

Sila si PO1 Policarpo Barliso Jr., PO1 Ginno Guiaman, PO1 Michael Forosuelo mga Field Training Police (FTP) kinsa maoy miresponde sa hitabo nagkanayon nga si Wolf kinsa giingong hubog ug nag-wild sa ilang sulod-balay, ug maoy hinungdan nga si Charry nangayo og panabang ngadto sa iyang amigong polis nga si PO1 Guiaman.

Naabtan sa tulo ka FTP si Wolf nga nanghasi pa kini hinungdan nga ilang gisikop ug gibalhog sa detention cell.

Gisusi pa sa kapolisan unsay hinungdan sa kasuko niini. (Brenda D. Batuto) (BANATNEWS)