Centcom alerto sa Bag-ong Tuig

CEBU, Philippines - Nagpabiling alerto ang kasundalohan dinhi sa Central Visayas bisan pa sa gipatumang suspension of military operation sugod karong adlawa hangtod sa Enero 1, 2010 sa gabii.

Kini maoy gipahibawo sa tigpamaba sa Central Command (Centcom) nga si Major Wilson Feria kinsa miingon   nga wala silay kompiyansa sa maong mga adlaw tungod sa gihimong pagpangataki sa ilang mga military detachment didto sa Negros island nga giatol sa susamang mga adlaw pipila na ka tuig ang nakalabay.

Matud ni Feria nga dili sila buot nga makahigayon ang mga sakop sa rebelding New People's Army (NPA) sa paglusad og mga pagpangataki ilabina sa pagsugat sa Bag-ong Tuig.

Gani iyang giklaro nga panagana lamang kining ilang gihimo aron dili sila mahimutang sa makuyaw nga kahimtang sa higayong molusad gyud og pagpangataki ang mga NPA sa maong mga adlaw.

Hinuon gisalig ni Feria nga andam usab silang moabag sa Philippine National Police (PNP) didto sa Negros Island ug sa uban pang lugar dinhi sa Central Visayas pagpahamtang sa kahapsay ug kalinaw ilabi na sa pagsugat sa Bag-ong Tuig.

Gipasidan-an usab niya ang tanang sakop sa Centcom nga dili gyud magpabuto sa ilang armas sa pagsugat sa Bag-ong Tuig ug labaw sa tanan dili maghubog-hubog aron paglikay sa kadaot.

Bonus nadawat na sa mga teacher

Hingpit nang nadawat sa mga magtutudlo sa pampublikong tulunghaan dinhi sa Central Visayas ang ilang Christmas bonus (CB) niadtong Martes, ang katapusang adlaw sa trabaho sa gobyerno alang niining tuig 2009.

Apan ang Finance Officer sa Department of Education (DepEd) 7 nga si Flor Aclan nagkanayon nga P7 mil lamang sa P10 mil nga CB maoy nadawat sa maong mga magtutudlo.

Sumala pa ni Aclan nga mao kini mando ni Education Secretary Jeslie Lapus nga nadawat sa buhatan ni DepEd-7 Regional Director Ricaredo Borgonia nga tag- P7 mil ra gyud ang dawaton sa mga magtutudlo.

Kini tungod kay mao ra kining kantidara ang gipagawas sa Department of Budget and Management (DBM), matud pa ni Aclan.

Sayo niini daan nang mihangyo si Lapus sa DBM nga kahatagan og P10 mil nga bonus ang mga magtutudlo sa mga eskuylahan sa kagamhanan sa nasud.

Kini ipaagi sa pagbutang og hustong pundo sa DepEd aron maoy mohatag niini ngadto sa iyang mga kawani.

Apan hangtud karon wala pa gihapon makahatag og tubag ang buhatan sa DBM kalabot sa maong hangyo , hinungdan nga walay ikadugang nga P3 mil ang DepEd isip iyang counterpart ug ikadugang sa dawatunon unta sa iyang mga kawani aron unta mahimong P10 ang katibuk-ang madawat nila.

Apan gibutyag ni Aclan ang dakong kalagmitan nga sa buwan pa sa Enero sa sunod tuig madawat sa hintungdang mga magtutudlo sa Central Visayas ang dugang nga P3 mil kun kahatagan kini og pagtugot sa DBM. (Chester Abadilla) (BANATNEWS)