Lalaki napatay sa swat

CEBU, Philippines - Patay nang nahidangat sa tambalanan ang usa ka lalaki nga nakigpinusilay sa kapolisan atol sa checkpoint nga gipahigayon sa dalan C. Rodriguez, barangay Capitol Site pasado alas 11 sa miaging gabii.

Si Nestor Blanco, taga Riverside, Sapangdaku, siyudad sa Lapulapu, napusilan sa usa ka sakop sa Special Weapons and Tactics (SWAT) sa Cebu City Police Office nga si PO2 Conrado Alega.

Ang kapolisan sa Fuente Osmeña Police Station, inabagan sa mga sakop sa SWAT sa CCPO mipahigayon og checkpoint sa naasoy’ng lugar sa dihang naabot ang duha ka lalaking nagmotorsiklo.

Si Blanco nag-angkas sa motorsiklo nga gimaneho sa kauban niini nga wala mailhi sa kapolisan, sa dihang gipahunong sa kapolisan pinaagi sa pag-senyas.

Apan imbes mohunong aron magpa-inspeksyon sa kapolisan, mipakusog na hinuon og padagan ang nagmaneho sa motorsiklo ug ang angkas niini nga si Blanco mipabuto sa dala niining wala mahibaw-ing kalibre sa armas tumong ngadto sa kapolisan.

Ang kapolisan nga dali usab nga nakabantay sa pagpamusil ni Blanco daling nakatago hinungdan nga walay naigo kanila.

Sa dihang mibalos na og pusil ang kapolisan ngadto ni Blanco, wala kini masuwertehe tungod kay naigo si Blanco sa luyong bahin sa iyang lawas nga maoy hinungdan sa iyang pagkatagak sa motor. Sa mga namusil, si PO2 Alega ang nakaigo kang Blanco.

Ang kapolisan dali usab nga midala ni Blanco sa Cebu City Medical Center apan gideklarar kini nga dead on arrival samtang gisuwayan unta sa paggukod sa kapolisan ang drayber sa maong motor nga gisakyan ni Blanco, apan wala na kini maabti.

Samtang nakuha sa attending nurse sa maong tambalanan ang mga gamit ni Blanco sama sa itom nga bonnet, cellphone, expired LTO temporary license, New Guardian Inc. (NGI) ID nga adunay ngalan ni Blanco, pitaka nga camouflage ug usa ka buhing bala.

Nakuha usab sa crime scene ang kalibre .45 nga armas uban sa lima ka buhing bala nga gigamit ni Blanco pagpusil sa kapolisan ug usa ka kabhang sa maong armas.

Boluntaryo usab nga gitahan ni PO2 Alega ang armas nga iyang gigamit sa pagpusil patay ni Blanco nga mao ang M16 armalite rifle.

Sa pakighinabi ni SPO4 Alex Dacua sa Homicide Section nagkanayon kini nga posibleng adunay mga dautang katuyoan ang duha hinungdan nga misukol kini sa kapolisan.

Dugang pa ni Dacua nga ila pa karon nga gipaabot kun si kinsa ang nakaila ni Blanco tungod kay adunay posibilidad usab nga usa siya ka police asset tungod sa iyang NGI ID nga nakuha.

Sa pakighinabi usab sa Banat News ni Chief Insp. Arnel Banzon, hepe sa Fuente Police Station nagkanayon kini nga anaa sa iyang kustodiya si PO2 Alega ug kun siya usab ang pasultihon dili angayan nga pasakaan og kaso si PO2 Alega kini tungod kay lehitimo nga police operation ang pagpahigayon og checkpoint nga naagian ni Blanco. (BANATNEWS)