Nang-hostage napatay sa polis

CEBU, Philippines - Usa ka lalaking miunay og hostage sa iyang igsuong babaye ug duha ka bata ang namatay human pusila sa mga polis diha sa barangay Kayam lungsod sa San Remegio kagahapong adlawa.

Ang napatay mao si Edgie Gallarde, 28, taga barangay Kayam sa nahisgutang lungsod, samtang ang gi-hostage niini mao ang 17-anyos niyang igsuong dalaga ug anak sa naulahi nga usa pa ka tuig ug ang 5-anyos nga pag-umangkon.

Sumala pa ni Insp. Rully Lauron, hepe sa San Remegio Police Station sa pakighinabi sa Banat News nga ang 17-anyos nga gi-hostage gikatahong milayas diha sa ilang balay diin usab magpuyo ang suspek tungod kay gipunayan kini og molestiya sa naulahi.

Ang 17-anyos nga dunay usa pa ka tuig nga anak adto na mipuyo sa igsuong babaye sa barangay Hagnaya ug nagtrabaho ang 17-anyos sa usa ka imnanan diha sa barangay Kayam.

Nianang Lunes sa gabii, ang suspek giingong miapas sa imnanan nga gitrabahoan sa 17-anyos aron pabalikon sa ilaha og puyo apan wala niini maabti.

Ang suspek kagahapon kaadlawon sa kasuko kalit mition og kalibre .38 rebolber sa ilang inahan hinungdan nga milakaw ang naulahi ug misumbong sa 17-anyos.

Ang suspek tungod sa kasuko mihulgang patyon ang mga bata hinungdan misumbong sa kapolisan ang manag-inahan ug gitambagang paulion ang duha ug pasaligang mouli na og balik ang 17-anyos aron kini lipaton ug makuha ang duha ka bata.

Apan nakabantay kini sa pagkahanaw sa mga bata hinungdan nga gi-hostage niini ang igsuon gamit ang kutsilyo samtang ang mga polis diha sa gawas nagpaabot sa mosunod nga hitabo.

Dihang miluag ang gunit sa suspek ngadto sa 17-anyos mikaratel kini og dagan ug dihadiha nakahigayon ang kapolisan pagpusil kaniya nga nakaingon sa hinanali niining kamatayon.

Matud pang Lauron nga duna nay kasong pagpatay ang suspek didto sa Masbate duha ka tuig na ang nakalabay. (Raymond Abarcas, UV Journalism Intern) (BANATNEWS)