Duha ka lalaki gipamusil sa Lapu'

CEBU, Philippines - Kritikal ang kahimtang sa duha ka mga tawo nga gipamusil sa sitio Eskwelahan barangay Basak dakbayan sa Lapulapu kagahapon sa kaadlawon.

Ang biktima mao sila ni Alfonso Rafaeles Jr., 20, residente sa Sto. Niño barangay Basak dakbayan sa Lapulapu ug Dionesio Agusto, residente sa sitio San Vicente barangay Basak dakbayan sa Lapulapu usa ka sakop sa Aviation Security sa OPASCOR nga nadestino sa MCIAA.

 Samtang ang gitumbok nga namusil mao si Rizaldo Tampus Jr., 36, residente sa maong dapit ug ang kauban niining si Jessie Potot ug usa ka giila lang nga ‘Ybañez.’

 Base sa pasiunang imbestigasyon ni SPO1 Honorato Inihao sa Crime Against Persons Desk sa kapolisan sa Lapulapu nasuta nga posibleng panimawos ang motibo sa maong pagpamusil ngadto kang Agusto ug naangin lamang si Rafaeles gumikan kay nagkakuyog sila atol sa maong hitabo.

 Sumala pa ni SPO1 Inihao nga sa milabay'ng gabii nagkabangi na sila ni Agusto ug ang grupo ni Tampus ug kagahapon sa kaadlawon nakahigayon ang mga suspek ug gipusil ang mga biktima.

 Si Rafaeles nahiagom og duha ka samad pinusilan sa dughan, samtang si Agusto samaran sa dughan, liog ug sa lawas ug pulos naa sa talandugong kahimtang ug daling gidala ngadto sa Vicente Sotto Memorial Medical Center.

 Nasikop sa gihimong hot pursuit operation sa kapolisan si Tampus diha sa iyang balay apan nakaipsot sila si Potot ug Ybañez.

Si Tampus nanghimakak og kalambigitan sa maong pagpamusil kay atol sa maong hitabo anaa ra kini sa ilang panimalay natulog ug wala gyud kini molakaw. BANATNEWS)