Pushers sa siyudad nagpabukid

CEBU, Philippines - Nanglayas na gawas dinhi sa dakbayan sa Sugbu ang mga nailang mga drug pusher ug toa na karon sa nagkadaiyang lungsud sa Probinsya sa Sugbu nagpadayon sa ilang illegal nga kalihukan. Kini maoy gibutyag ni Chief Insp. George Ylanan ang hepe sa Investigation Section sa Investigation and Detective Management (IDMB) sa Cebu City Police Office (CCPO) atol na sa programang “Kapulisan ug ang Katawhan” sa dySS Super Radyo nga pipila nalang ang nagpabilin niini dinhi sa dakbayan.

Matud pa ni Ylanan, nga ang mga drug pushers sa dakbayan sa Sugbu naglisod na sa pagpamaligya sa illegal drugs dinhi tungod usab sa maayong programa sa kapulisan sa dakbayan ingon man sa koordinasyon sa komunidad.

Hinuon ang barangay Ermita, Pasil ug ubang area sa uptown Cebu City duna gihapoy mga drugas apan dili gyud sama niadto nga ladlaran ang pagpamaligya niini kumparar sa nilabay’ng mga katuigan.

Gibutyag niini nga usa usab karon nga ilang gihingusgan ang kampanya sa illegal drugs mao ang pagkatap sa shabu sa mga bukirang barangay dinhi sa dakbayan.

Matud pa niini nga dunay mga driver sa habal-habal nga maoy gikatahong nalambigit niining pag-transport sa mga shabu ngadto na sa mga bukirang barangay. BANATNEWS)