CEBU, Philippines - Patay nang nadangat sa tambalanan ang usa ka ulitawo human mi-ambak gikan sa gisakyang barko niadtong Sabado sa gabii didto sa Pulangbato Warf, barangay Pulangbato dakbayan sa Bogo.
Ang namatay giila sa kapulisan nga si Jessie Sotto, 23, taga barangay Calapayan, lungsud sa Kawayan, Masbate ug kasamtangang nagpuyo diha sa lungsod sa Consolacion.
Si SPO3 Allan Dosdos, imbestigador sa Bogo City Police Station nga gikahinabi sa Banat News miingon nga nakurat nalang ang ubang mga pasahero ug crew sa Super Shuttle Ferry 19 nga molarga na unta niadtong gabhiuna dihang kalit nga miambak si Sotto.
Sumala pa ni SPO3 Dosdos nga usa ka pasahero nga si James Sinadjan taga Masbate ug pasahero usab sa maong barko maoy nakakita ni Sotto dihang kalit misaka sa railings sa 2nd deck sa barko dayon ambak.
Matud pa niini nakabantay siyang may usa ka lalaking misaka sa 2nd deck nga layo kaayo og panan-aw ug nakurat nalang siyang milayat kini hinungdan nga dali siyang mitawag sa mga crew ug gi-rescue si Sotto.
Si Sotto gidala sa Severo Verallo Hospital apan gideklarar nga dead on arrival.
Nailhan lang si Sotto subay sa bill of lading nga gidala niini tungod sa iyang gidalang tulo ka manok igtatari, wala usab kini laing mga dokumentong mag-ila kaniya.
Hinuon gi-claim na ang patay'ng lawas niini ug giila gyud sa iyang manghod ug gibiyahe na kagahapong adlawa paingon sa Masbate sakay gihapon sa barkong iyang gi-ambakan.
Sa gihimong follow-up nga imbestigasyon sa kapulisan nasuta nga lima ka bulan nga nagpuyo sa igsuon si Sotto diha sa Consolacion ug gikatahong nananghid kining mopauli.
Gibutyag usab sa igsuon niining si Christine nga nabantayan nilang niadto pa untang Pasko kini gustong mopauli ug namatikdan nilang magul-anon na kini sa nangaging mga adlaw. (Guam Logroño ug Darrel Carumba) (BANATNEWS)