CEBU, Philippines - Ang kapolisan sa lungsod sa Tabogon padayon pang naniidsa laing tawo kinsa gikatahong usa sa mga nalambigit sa pagpatay sa manag-uyab niadtong Sabado sa kaadlawon didto sa sitio Lumboy, barangay Muabog sa nahisgutang lungsod.
Si Senior Inspector Alexander Angcao, hepe sa Tabogon Police Station mibutyag sa Banat News kagahapon nga aduna silay gisundan karong tawo nga maoy prime suspect sa maong hitabo, apan ang hepe sa kapolisan sa lungsod nagdumili sa pagbutyag sa ngalan sa maong tawo.
Matud ni Inspector Angcao nga gawas kang Felino Monares nga tanod sa barangay Muabog ,nangita pa sila og laing saksi sa hitabo.
Kahinumdoman nga sila si Pacita Dol-dol ug Crispin Dogon pulos patay nga wala nay sapot ug kinabuhi nga napalgan ni Monares sa sulod sa usa ka gibiyaang payag didto sa sitio Lumboy.
Ang mga biktima namatay sa mga samad tinigbasan sa ilang kalawasan ug gituohan sa kapolisan nga puwerting sukoa sa kriminal ngadto sa mga biktima.
Kahinumdoman usab nga si Tapias Brion kinsa giingong dugay nang naibog kang Dol-dol anaa na karon sa kostudiya sa kapolisan aron ligiron og sukit-sukit bahin sa maong hitabo. Gipasabot ni Angcao nga si Brion ilang gisikop tungod sa napundong kaso niini nga Act of Lasciviousness base sa Akta Republika 7610 kun Child Abuse.
Usa sa gilantaw sa kapolisan nga motibo sa maong hitabo mao ang kabahin sa gugma tungod kay base sa ilang nadawat nga report, gawas kang Dogon aduna pay laing uyab si Dol-dol. (Brenda D. Batuto) (BANATNEWS)