Dunggab, tagak 2 ang patay

CEBU, Philippines - Duha ka tawo ang namatay gumikan sa pagpanunggab ug pagkatagak niadtong Biyernes sa managlahing lugar sa dakbayan sa Talisay.

Ang namatay gumikan sa dunggab mao si Jijie Manporte, alyas “Ging-ging”, 36, nga taga sitio Mananga River, barangay Dumlog sa maong dakbayan, samtang ang natagak sa gitrabahoan niyang edipisyo ug namatay mao usab si Renato Reyes, 45, minyo, usa ka trabahante sa konstruksyon nga taga barangay Can-asojan, dakbayan sa Carcar.

Si Manporte samdan sa ubos nga bahin sa iyang tuo ug walang bahin sa dughan nga maoy hinungdan sa hinanali niyang kamatayon.

Si PO3 Mikie Espina ug PO2 Stephen Sefuesca sa Talisay City Police Station miila sa suspetsado nga si Dominador Marayan, hingkod, nga taga barangay Biasong, Talisay.

Sumala sa maong mga polis nga niadtong Huwebes sa gabii mikuyog ang biktima sa iyang mga barkada nga nanag-inom og bino ug nianang pagkabuntag napalgan nalang kini nga patay na ug natusak na ang dughan sa mga samad dinunggaban.

Hinuon nasikop dayon ang suspetsado ug nagpahayahay na kini karon sa prisohan sa Talisay.

Samtang si Reyes nag-ayo sa air conditioning unit sa ikaduhang andana sa gitrabaho nilang edipisyo sa barangay Tabunok, dakbayan sa Talisay dihang kalit kining natagak.

Ang namatyan sa biktima mao ang pagkapantok sa bagolbagol niini sa sementadong sawog sa maong building. (BANATNEWS)