CEBU, Philippines - Duha ka tawo ang nawad-an sa kinabuhi gumikan sa pagkalumos sa managlahing lugar sa Metro Cebu kagahapon.
Ang nasakwat sa mga sakop sa NAVFORCEN didto sa kadagatan sa Keepel Shipyard sa barangay Looc, dakbayan sa Lapulapu kagahapon sa buntag mao ang usa ka babaye nga gibana-banang may 20-25 anyos ang edad.
Samtang ang naglutaw nga patay na sa usa ka swimming pool sa barangay Dumlog, dakbayan sa Talisay sa pagkahapon mao si Erlorzay Sembrano, 5, nga taga barangay Mohon, sa maong dakbayan.
Sa pagkakaron nagpabiling wala hiilhi ang babaye nga naglutaw sa kadagatan sa Lapulapu apan maila kini siya nga taas og buhok ug kasagaran ang pamanit niini ug may gitas-ong 5’3”.
Nagsul-ob kini og t-shirt nga blue ang kolor nga may markang Pringles Teddy Bear ug jogging pants nga kolor gray.
May mga singsing ang tuo ug walang tudlo niini, may kuwentas usab kining bulawan.
Ang mga otoridad sa NAVFORCEN miawhag sa mga tagtungod sa pag-ila sa namatay ug sa pagkuha niini gikan sa punerarya sa dakbayan sa Lapulapu.
Samtang si Sembrano giingong mikuyog sa iyang iyaan nga misalmot sa usa ka Christmas party nga gipahigayon didto sa usa ka dakong resort sa Talisay.
Matud pa sa kapolisan sa maong dakbayan nga nalingaw ang iyaan sa bata ug wala kini makabantay nga nalumos na ang iyang pag-umangkon.
Mao nalay namatngonan sa tanan nga milutaw na ang lawas patay ni Sembrano sa swimming pool busa dali nilang gihatod ngadto sa Talisay City District Hospital diin kini ideklarar nga patay na.(Bong Soriano ug Raymond D. Abarcas UV Journalism Intern) (BANATNEWS)