CEBU, Philippines - Naghinam-hinam na nga mosayaw si Cebu City First Lady Margot Osmeña sa umaabot nga Sinulog festival sunod buwan human mapakyas pagsayaw sa miaging Sinulog. Ang unang ginang sa siyudad, didto sa Estados Unidos sa miaging Enero ug maoy miatiman sa iyang bana nga si Mayor Tomas Osmeña nga nagpatambal tungod sa sakit niining urinary bladder cancer.
Tungod niini si Margot wala makasayaw sa Sinulog ug gihulipan na lang ni Miss Earth 2008 Karla Paula Henry nga maoy nangulo sa mga dancers sa grand finale.
Alang kang Margot, ang Sinulog 2010 mas makahuluganon tungod kay kini maoy ika-30 na ka tuig sa festival ug posibleng kini usab maoy katapusan niyang pagsayaw.
“It will be my last dance na siguro kay tiguwang na baya ko, unless they have something appropriate for an older person,” matud pa sa 60-anyos nga si Margot nga nagkatawa.
Giklaro ni Margot nga ang iyang pagsayaw maoy pagpasalamat kang Señor Santo Niño ug sa mga Sugbuanon nga nag-ampo sa maayong panglawas sa iyang bana.
Ang mayor malampusong gipaubos sa operasyon sa iyang pantog niadtong miaging buwan sa Abril human sa pipila ka chemotherapy sessions.
Si Margot musayaw sa grand finale sa Sinulog 2010 uban sa 500 ka mga dancers gikan sa nagkadaiyang mga institusyon ug sa dancesport team sa siyudad.
“It will be a nice one, it will be elegant, basta nindot gyud and I’m sure that people will never be disappointed sa akong sayaw,” matud pa niini, ug midugang nga magsugod na sila sa practice sa ilang dance steps niining semanaha. Samtang kun sigurado nang mosayaw si Margot sa Sinulog, wala pa matino kung mosayaw ba usab si Gobernadora Gwendolyn Garcia sa Sinulog sunod buwan.
Ang babayeng gobernador wala pugngi nga musayaw sa Sinulog 2010, apan wala lang imbitaha niining higayuna sa mga organizers tungod sa kasungian niini sa mayor. Kahinumduman nga niadtong Enero, si Garcia miapil pagsayaw sa Tostado festival dancers nga nisalmot sa Sinulog 2009 isip guest contingent. – BANAT NEWS