CEBU, Philippines - Usa ka ferry ang nasangad samtang naglawig sa kadagatan sa Dumaguete diha sa kadagatan sa barangay Talisay sa Dumaguete City niadtong milabay'ng gabii.
Matud pa ni Reven Pimentel, 2nd class officer sa Coast Guard Dumaguete sa pakighinabi sa Banat News nga ang MV Super Shuttle Ferry 18 padulong sa Dapitan City.
Ang maong ferry boat may dalang 156 ka pasahero ug tripulante, mibiya sa Dumaguete pasado alas-6 ug gipaabot untang maabot pasado alas 10 apan nasangad. Matud pang Pimentel, ang kapitan sa ferry boat nga si Captain Rene Mallen mipahibalong nagkaproblema sila dihang miungot ang manobela ug dili na niya makontrol ang direksyon niini hangtud nasangad.
Hinuon naluwas ang tanang pasahero human usa ka pumpboat ang nahiagi ug gibalhin ang mga sakay sa ferry boat. Gipaabot nga mosumiter og marine protest karong adlawa ang kapitan kabahin sa hitabo.
Ang maong barko gipanag-iya sa Asian Marine Transport Corporation nga nagbase dinhi sa Sugbo. – BANAT NEWS