Agri-sector kinahanglang tutukan - Plaza

CEBU, Philippines - Kagutom ug walay matapuk-an sa adlaw sa Pasko ug Bag-ong Tuig sa mga pamilyang kabus sa Kabisay-an ug Mindanao ang nakita ni Agusan del Sur Cong. Rodolfo “Ompong” Plaza atol sa iyang pagbisita dinhi sa Sugbu sa milabay’ng adlaw.

Si Plaza nga maoy guest speaker sa Cebu Game-fowl Breeding Association kun CEGBA Induction of Officers nga gipahigayon sa White Gold House sa North Reclamation area ning dakbayan sa Sugbu, namahayag nga gumikan kini sa kakulangon sa atong gobiyerno paghatag og tukmang kapanginabuhian alang sa mga kabus maoy hinungdan nga daghan ang gigutom dinhi sa nasud. “More people are going hungry because we lack honest and sincere government officials concerned of the poor people,” matud pa ni Plaza kinsa magpapili pagka-senador sa umaabot nga election.

Matud pa ni Plaza iyang naobserbahan nga daghan kaayong makililimos nga nagpasad sa kadalanan ug daghang kabataan ang nakita nga nanaygon sa karsada inay unta adto sila sa mga tunghaan sa gobiyerno o ilang panimalay uban sa ilang pamilya.

Gihimong sanglitanan ni Plaza ang kapakyas sa administrasyon paghatag og Post Harvest Facilities sa mga mag-uuma alang sa pag-ugmad sa ilang panginabuhian.

Nagkanayon siya nga mas gipahimug-atan sa gobiyerno ang pag-import og bugas tungod sa dakong makurakot sa mga hiwing opisyal sa gobyerno sa matag transaksiyon niini.

Gitinguha ni Plaza nga kun siya mapili iyang iduso ang mga balaudnon nga magsuporta sa agricultural system sama sa irrigation projects aron matabangan ang agricultural sector.   (Bong Soriano)   (BANATNEWS)