CEBU, Philippines - Mga residente sa sitio Rattan, barangay Tanke, dakbayan sa Talisay nasagmuyo sa kabomberohan sa siyudad tungod sa giingong kalangay pagresponde sa alarma sa sunog tungod kay walay nakatubag dayon sa tawag sa telepono.
Niadtong Biyernes sa alas 6:50 sa gabii 13 ka balay ug usa ka sakyanan ang naugdaw sa nahitabong sunog diha sa lugar nga gibana-banang midanyos og P400, 000.
Si Estella Raagas, 37, kinsa usa sa mga nasunogan sa pakighinabi niini sa Banat News kagahapon nagkanayon nga ang uban nilang mga silingan ang nagpuli-puli og tawag sa Talisay City Fire Station apan walay motubag dayon.
Ang Banat News nakadawat usab og mensahe sa text gikan sa usa sa mga residente kinsa nagdumili sa pagpabutyag sa iyang ngalan ug nangutana kung wala bay opisina ang kabomberohan niadtong Biyernes tungod kay walay motubag sa ilang tawag.
Apan ang maong pasangil gihimakak ni City Fire Marshal Felipe Canillas, matud niini nga ubos sila sa “red alert” karon ug gani walay bisan usa nilang gitugotang maka-leave ug posibleng ang ilang telepono na-busy sa mga tawag hinungdan nga wala dayon makasulod ang tawag sa mga residenteng nasunogan.
Si Canillas nagkanayon nga naglisod sila sa pagsulod sa karsada sa lugar tungod sa kagamay niini ug ang ilang hose na lang maoy ilang gipalusot. (Brenda D. Batuto uban ni Raymond D. Abarcas UV Journalism Intern) (BANATNEWS)