CEBU, Philippines - Pormal nang gitugyan ni Kongresista Nerissa Soon-Ruiz ug sa Rotary Club of Mactan ang lima ka kompletong unit sa computers ngadto sa mga tinun-an sa Alternative Learning System kun ALS sa barangay Guizo dakbayan sa Mandaue sa milabay'ng hapon.
Si Lea Santiago ang Mobile Teacher Incharge sa ALS malipayong midawat sa maong mga computer sets alang sa iyang 50 ka mga tinun-an.
Matud pa ni Santiago dako kini og ikatabang ngadto sa iyang mga tinun-an nga mahatagan og edukasyon sa pagamit sa computer alang usab sa ilang pagpanarbaho human kini mogradwar sa high school.
Gumikan sa kompetisyon sa mga high tech nga pamaagi karon sa pagpanarbaho kinahanglan nga mahibalo usab ang mga tinun-an sa paggamit sa computer dugang pa ni Santiago.
Samtang si Bonifacio "Jon" Mercado ang presidente sa Rotary Club of Mactan mipadayag nga andam sila kanunay nga motabang sa mga tinun-an nga wala na magtungha sa mga regular nga tunghaan diin lakip kini sa ilang proyekto sa Rotary ang edukasyon ngadto sa mga kabus ug walay ikasarang sa pagpatungha sa mga dako ug pribadong tunghaan gumikan sa kawad-on. Samtang si Ruiz usab sa iyang bahin nakahilak sa liriko sa awit sa usa ka tinun-an sa ALS nga nagpasalamat ngadto kaniya sa pag-abag niini nga makalampos sa ilang pagtuon bisan pa sa pipila ka tuig nga naundang kini sa pag-eskwela sa sekondarya.
Gipasalamatan usab ni Ruiz ang Rotary Club of Mactan sa maong abag niini nga wala gyud magmakuli gumikan sa ila usab nga adbokasiya sa paghatag og maayong kaugmaon ngadto sa mga kabataan nga napalta sa dugay'ng panahon sa ilang pagtungha. - BANAT NEWS