Kontrobersyal nga lote giduaw ni Gibo

CEBU, Philippines - Si kanhi defense secretary Gilbert Teodoro nga maoy standard bearer sa Lakas-Kampi-CMD ug si Gobernador Gwendolyn Garcia miduaw kagahapon sa gikagubtang lote nga gipanag-iya sa pamilyang Balili sa barangay Tuyan, dakbayan sa Naga.

Mao kining yutaa nga nahimutang ilawom sa dagat nga gibayran sa Kapitolyo og himabaw sa P100 milyones.

 Si Teodoro kinsa maoy pinasidunggang dinapit sa Barangay Assembly sa lungsod sa Minglanilla, misil-ing nalang ngadto sa maong luna tungod sa kaduol niini sa Naga gikan sa Minglanilla.

 Apan giuna niya ang pagbisita sa maong lote kay gidala siya ni Garcia una siya moadto sa barangay assembly sa Minglanilla.

 Tungod sa padayon nga imbestigasyon sa maong lote, ang gobernador nagkanayon nga gamiton nalang kini sa lalawigan alang sa programa bahin sa pangisda ug sa panguma.

 Ang gobernador nagkanayon nga sa maong luna makita ang nagkalainlaing matang sa talagsaong mga tanum og mga buwak.

 Uban sa pagbisita sa gobernador didto sa maong lugar, nanghatag usab siya og semilya sa tilapya ug bangos ngadto sa mga mangingisda sa Naga. - Chester Abadilla (BANAT NEWS)