Pangrehistro sa bag-ong botante hapsay

CEBU, Philippines - Malinawon ang unang adlaw sa extension alang sa pagpangrehistro sa mga first time voters niadtong adlaw'ng Lunes tungod kay nagtuo ang mga opisyal sa Comelec nga gamay nalang kaayo ang magparehistro nga mga bag-ong botante alang sa umaabot nga eleksyon sunod tuig.

Mao kini pangagpas ni Provincial Comelec supervisor Atty. Lionel Marco Castillano human dili na kaayo daghan ang nagparehistro sa kalungsoran ug siyudad sa pagsugod sa unang adlaw sa extension sa registration niadtong Lunes.

Matud ni Castillano iyang nasuta nga dili na kaayo daghan ang mga bag-ong botante nga naglinya ug nagparehistro subay sa gipahibawo kaniya sa iyang mga election officers sa kalungsoran ug siyudad sa probinsya sa Sugbu.

Gitataw hinuon ni Castillano nga normal ug walay nasugatang problema atol sa unang adlaw sa extension sa registration.

Giklaro sa Comelec nga dili na sila modawat niadtong mga bag-ong botante nga moparehistro unya sa buwan sa Enero sunod tuig.

Matud sa tigpamaba sa Comelec nga si James Jimenez nga gilugwayan lang ang registration sugod niadtong Lunes hangtud sa petsa 29 niining bulana.

Karung semanaha kutob nalang karung adlawa (Miyerkules) ang registration tungod sa Pasko ug sunod semana ang registration ipahigayon lang sa petsa 28 ug 29. Gipasabot ni Jimenez nga gihimo nila kini kay sa buwan sa Enero susihon pa nila kon kuwalipikado ba nga makaparehistro ang tanang aplikante sa ilang buhatan.

Sa nasayran ang korte suprema una nang nitugot sa extention sa registration sugod niadtong Lunes human nisang-at og petisyon ang Kabataan Partylist.  - BANAT NEWS