CEBU, Philippines -Gipasidan-an sa Department of Labor and Employment (DOLE)-7 ang mga employers nga dili magpabuta-bungol ug bayran sa ensakto ang ilang mga trabahante nga motrabaho atol sa Christmas Holidays.
Si Department of Labor and Employment (DOLE)-7 regional director Elias Cayanong nagkanayon nga andam silang modawat og mga reklamo gikan sa mga empleyado nga dili sila mabayran sa sakto sa ilang mga employers sa overtime pay alang sa gideklarar nga non-working holiday karung Disyembre 24 ug 31.
Giklaro ni Cayanong nga niining mga adlawa makadawat sila og dugang 30 porsiyento sa ilang inadlaw nga suhulan niadtong manarbahong mga empleyado.
Iyang gitataw nga samtang sa mga regular working holiday sama sa Disyembre 25, 30 ug Enero 1 doble usab dawaton nga suweldo niining mga adlawa kun kini gitrabahoan sa mga empleyado.
Nunot niini, nagkanayon siya, dako kaayo kini og tabang sa mga ordinaryong mamumuo sanglit makadugang naman kining mao nga benepisyo sa kinitaan sa mga empleyado ilabina karun nga mosaka ang mga nag-unang palaliton atol sa Christmas holiday.
Naandan naman gyud sa mga Filipino nga mamalit ug mga gasa sa ilang minahal sa kinabuhi busa ang mga negusyante mopahimulos usab sa pagpamahal sa ilang mga baligya. - BANAT NEWS