15 ka tawo nalanag sa party

CEBU, Philippines - Katorse ka kawani ug usa ka bata ang nalanag sa gikaon atol sa gipahigayon nilang Christmas Party sa usa ka sikat nga uptown nga kan-anan ning dakbayan niadtong milabay'ng gabii.

Ang mga nangalanag gilangkuban sa 14 ka mga kawani sa Henry Lhuillier Pawnshop ug ang usa ka 15-anyos nga anak sa usa sa mga kawani diha sa maong kan-anan (pangalan gipugngan sa Banat News hangtud di kakuhaan sa ilang habig).

Sa pakighinabi sa Banat News ni Jesus Rey Tito Cabalida, amahan sa batang nalanag, pasado alas-8 sa miaging gabii nanihapon na sila uban sa iyang asawa ug laing mga trabahante nga mitambong sa maong party.

Apan pipila ka minutos ang milabay aduna nay komosyon nga nahitabo tungod kay nagbanos-banos og sulod ug gawas sa kasilyas ang mga kawaning nangaon, usa na niini ang iyang anak nga naglain ang iyang tiyan ug lawas ug dihadiha nagsugod na og suka.

Tungod sa kabalaka dali niyang gidala ang anak sa Perpetual Soccour Hospital. Sa pag-abot nila sa maong tambalanan duna nay duha pa ka mga kauban nga nag-una pa kanilang gidala sa maong tambalanan nga susama gihapon og gipamati human makakaon.

Pipila ka minutos usab nagsunod nga miabot ang onse pa nila ka mga kaubanan sa maong party nga nagsuka-kalibang gihapon.

Ang Banat News misuway og tawag sa maong tambalanan aron pagkuha og dugang impormasyon kabahin sa mga biktima apan nagdumili sila pagbutyag niini.

Nagduda si Cabalida nga ang ilang gikaong seafood nga gihimong dessert nga susama og paypay og dagway ang nakaingon niini tungod kay pipila kanilang nakatilaw pulos nakaingon nga ‘lain kini og baho.’ Samtang sa pakighinabi sa Banat News ni Dr. Expedito Medalla sa Regional Epidemiology Surveillance Unit (RESU) nga ilang susihon ang sample sa pagkaon sa mga biktima.

Gikumpirmar hinuon sa maong doktor nga nangalanag gyud ang mga biktima tungod sa mga sintomas nga ilang gipamati.

Si Alice Loresta, ang personnel manager sa Henry Lhuillier Pawnshop dihang gihinabi sa Banat News miingon nga giasikaso na ang mga insurances sa nangalanag.

Samtang gitun-an pa nila ang lakang nga buhaton batok sa catering service nga maoy nagluto sa ilang pagkaon sa maong kan-anan. Ang Banat News misuway og tawag sa telepono sa maong kan-anan apan walay motubag niini.  – BANAT NEWS