Giluba sa nalisoag pangisip kritikal

CEBU, Philippines - Kritikal ang kahimtang sa usa ka 31 anyos nga lalaki human kini dunggaba sa iyang silingan nga nalisoan og pangisip didto sa sitio Kalubihan, barangay Libertad, lungsod sa Bogo niadtong Sabado sa hapon.

Ang biktima mao si Erick Placio Alicante, 31, ulitawo, nga may kapuyo nga taga Libertad, samtang ang suspek mao ra usab ang iyang silingan nga si Gerald Damayo Macadat, 20, ulitawo nga kuwang-kuwang.

Si PO2 Joseph Salvador sa Bogo Police Station mibutyag sa Banat News nga samtang naglingkod- lingkod sa gawas sa ilang balay ang biktima niadtong tungora kalit lang miabot ang suspek ug sa walay daghang pangutana gilanit niini ang dalang kutsilyo ug gihansakan ang tiyan sa biktima makaduha ka higayon.

Pagkahuman gibiyaan lang usab dayon sa suspek ang biktima nga nagkadugo dayong pauli sa ilang balay.

Ang mga kabanay na sa biktima maoy mihatod kaniya ngadto sa Vicente Sotto Memorial Medical Center (VSMMC) sa dakbayan sa Sugbo.

Hinuon human sa pipila ka oras, ang inahan sa suspek maoy boluntaryo nga mihatud sa naulahi ngadto sa kapolisan ug karon nagtingkagol na kini sa prisohan. (Darrel A. Carumba) ( BANAT NEWS)