Tapokanan sa tawo gibantayan sa kapolisan

CEBU, Philippines - Gibantayan sa kapolisan sa Mandaue City Police Office (MCPO) ang mga dapit nga tapokanan sa mga tawo sa panahon sa Pasko nga naglakip sa mga simbahan, mall ug uban pa.

Si Senior Superintendent Orlando Ualat nga nahinabi sa Banat News miingon nga ang matag hepe sa unom ka mga presinto maoy modistino sa ilang mga sakop nga mopatunhay sa kahapsay ug kalinaw sa mga simbahan ug uban pang establisamento sa maong mga lugar nga hugpaan sa katawhan karong Pasko.

Ang Presinto 1 sa Centro Police Station maoy mobantay sa   National Shrine of Saint Joseph, City Hall ug sa City Sports and Cultural Complex sa sitio Tribunal sa barangay Centro.

Ang maong mga lugar maoy tapokanan sa mga tawo nga manimba sa Misa De Gallo ug sa sayong gabii magbaha usab ang manuroy atubangan sa city hall   sa pagtan-aw sa mga kalingawan ug pagpamalit sa giladlad nga mga baligya nga naglakip sa pagkaon ug uban pang produkto gikan sa mga pabrika sa maong dakbayan.

Samtang si Chief Inspector Eduardo Castaneda, hepe sa kapolisan sa Presinto 2 sa Subangdaku Police Station mitahas sa iyang mga sakop sa pagbantay sa Park Mall nga dugokanan usab sa mga tawo tungod sa daghang kalingawan nga anaa sa maong dapit ilabina sa panahon sa kagabhion.

Ang Cebu International Convention Center (CICC) usa usab sa bantayan sa kapolisan kay tapukanan usab kini sa daghang mga tawo gumikan sa mga giladlad nga mga baligya sa maong lugar nga mga produkto gikan sa kalungsoran nga misalmot sa Christmas Bazaar nga gipasiugdahan sa kagamhanan sa lalawigan sa Sugbo. (Romeo T. Limpangog) ( BANAT NEWS)