Tanang gisuportahan ni Lito O. nangapilde; Sanchez di na mousab

CEBU, Philippines - Nihatag og katin-awan si Bise Gobernador Gregorio Sanchez Jr. nga layo ra sa kamatuoran ang giluwatang pamahayag ni kanhi gobernador Lito Osmeña nga napatik sa lokal nga pamantalaan niadtong Domingo nga siya ‘kiss of death’ sa kandidatura ni Hilario “Jun-jun” Davide III nga nagpasabot nga mapildi si Junjun tungod niya.

Si Sanchez sa gipatawag niining news conference kagahapon miingon nga kinahanglang masayod ang publiko nga tanang gisuportahan ni Osmeña kaniadto pulos nangaparot, ug siya (Sanchez) usa na niini.

Niadtong 1992 sa nagpares sila ni Annette Osmeña, asawa ni Lito sa pagka-gobernador sa lalawigan ug ang naulahi midagan pagka-presidente sa nasud, sila nangapildi lakip na ang halos tanan nilang local nga kandidato.

Matud ni Sanchez niadtong 2004, midagan siya sa pagkabise- gobernador ug si Celestino “Junie” Martinez maoy iyang kapares, apan si Martinez naparot samtang siya midaog bisan paman gibakwi ni Lito ang suporta kaniya ug gisuportahan si Nanding Celeste.

Pagka 2007 eleksyon, matud ni Sanchez nag-uban silang Gobernador Gwendolyn Garcia atbang sila si kanhi Kongresista Antonio Yapha ug Clavel Asas Martinez kinsa gipaluyohan gihapon ni Osmeña apan ang resulta napildi.

Si Lito gikatahong namahayag nga adto siya mosuporta ni Gov. Gwendolyn Garcia tungod kay sa katawhan kini nakasala ug wala kaniya apan ang ila ni Sanchez personal.

“Karun moingon siya nga mag-campaign manager kang Gwen? Kay si Gwen wala man makasala niya personally, ang sala ni Gwen ngadto raman sa katawhan, so, akong masabot nga ako wala makasala sa katawhan pero nakasala ko niya personally, so, naglibog ko. Na-amused ko sa iyang statement kay the Lito Osmeña nga akong nailhan before, mura og dunay virtue of wisdom apan sa kalit lamang it was a replace by doubts. Are you (Lito) pro-people? Or are you pro-Cebuano? Or ang imong kaugalingon ra maoy imong gitan-aw?” pangutana pang Sanchez.

Si Osmeña sa iyang bahin midumili na sa pagkomento sa mga pamahayag ni Sanchez sa interview sa DyRF.

“Iyaha sab na.. Atong respetohan ang iyang gisulti.....dili na lang ko molalis niya, tan-awon na lamang unya nato,” sigon pa ni Osmeña.

Samtang gipahibawo sa kanhi gobernador nga nakaduso na siya og tubag sa petition for disqualification batok kaniya ngadto sa Comelec kagahapong adlawa.

Masaligon siyang lig-on ang depensa niya batok sa maong petisyon nga mikwestyon kun molahutay pa ba siya sa usa ka national campaigns tungod kay duna siya’y ikapakitang daghang botos nga nakuha dihang siya midagan pagkabise-presidente ug sa pagka-presidente bisan og siya naparot.(Rey Pasaporte ug Chester Abadilla) ( BANAT NEWS)