CEBU, Philippines - Gitigbas makapila ka higayon ang usa ka ginang dayon gilunggoan sa iyang liog sa mag-uumang iyang gikalalis alas 6:30 sa milabay’ng adlaw diha sa barangay Lagundi sa lungsod sa Oslob.
Ang biktima giilang si Joan Cabilte, 23, lumulupyo sa barangay Lagundi, lungsod sa Oslob samtang ang giingong mitigbas ug milunggo sa iyang liog mao si Emilio Dalumpenis alyas “Mel” nga lumulupyo ra usab sa samang dapit.
Base sa taho nga nahidangat sa Operations Branch sa CPPO nga nakadawat og tawag ang buhatan sa kapolisan sa Oslob gikan ni Delia Caldine nga dunay pagpanigbas nga nahitabo sa ilang lugar.
Daling miresponde sila si PO2 Albert Yray ug si PO1 Rey Angelo Agustin sa lugar nga nahitaboan. Samtang padulong na sa maong lugar ang duha ka mga pulis giingong nasugatan nila ang usa ka lalaking naglakaw sa National Highway nga gitumbok sa mga residente nga maoy mipatay sa biktima.
Tungod niini ilang gidakop si Dalumpenis ug nakuhaan og usa ka 22.5 pulgadang sundang.
Ang pasiunang imbestigasyon, alas 6:30 sa buntag samtang ang biktima nagpasabsab sa iyang baka, giduol kini sa suspetsado ug gikomprontase bahin sa pananom sa suspetsado og lubi nga giingong gikaon sa binuhing baka sa biktima.
Tungod sa kainit sa ilang panaglalis milanit ang suspetsado sa gitak-ing sundang dayong tigbas niini makadaghang higayon sa kalawasan sa biktima nga miresulta sa hinanaling kamatayon nini.
Wala pa matagbaw ang suspetsado, giputol pa gyud niini ang ulo sa biktima ug gilabay ngadto sa pangpang nga gibanabanang 60 ngadto sa 70 metros ang gilay-on gikan sa lawas sa biktima.
Samtang nasuta usab sa imbestigasyon nga panagdumot tali sa amahan sa biktima ug sa suspetsado ang motibo sa maong krimen. BANAT NEWS